ئەڤرۆ نیوز، عەلی حاجی:

لژنا بلند یا چاڤدێریکرنا دەرمانخانە و کلینیکان و دەرمانان ل زاخۆ، د دەمێ حەفتیەکێ دا سێ دەرمانخانە و کلینیکەکا تیمارکاری سزادان ژ ئەگەرێ پێگری نەکرنا وان جھان ب رێنمایێن جڤاتا وەزیرێن ھەرێما کوردستانێ.

خەلات ئوسمان، نوونەرێ قایمقامیا زاخۆ د لژنا بلند دا بۆ ئەڤرۆ نیوز دیار کر، پشتی لژنا وان د سەرەدانەکا خوە دا بۆ چەند جھەکێن فرۆتنا دەرمانان و تیمارکاران د ناڤ سەنتەرێ باژێڕێ زاخۆ دا، کو پێشتر ژی ئەو جھە ھاتبوونە ئاگەھدارکرن ل سەر ھەبوونا کێماتیان، بەلێ دوبارە سێ دەرمانخانە پێگیر نەبووینە ب وان رینمایێن لژنێ یێن بۆ وان ھاتینە دان و گۆت: “ژ بەر نەبوونا دەرمانسازان ل وان دەرمانخانان، ئەو دەرمانخانە بۆ ماوەیێ سێ رۆژان ھاتنە دائێخستن و ھەرئێک ب کوژمێ ٥٠٠ ھزار دیناران ژی ھاتنە سزادان و ل بەرامبەر دوبارەبوونا ڤێ سەرپێچیێ، خودانێن وان دەرمانخانان دێ ئێکسەر بۆ دادگەھێ ھێنە رەوانەکرن، ل دووڤ نووترین رێنمایێن جڤاتا وەزیران، دڤێت د ھەر دەرمانخانەکێ دا دەرمانسازەک ھەبیت”.

نوونەرێ قایمقامیا زاخۆ د لژنا ناڤھاتی دا گۆتژی: “د بەردەوامیا لێگەڕیانا مە دا ھەر د ڤێ حەفتیێ دا ئەم شیاین کلینیکا تیمارکارەکی سزا بدەین، ژ بەرکو کلینیکا وی تیمارکاری یا پیسبوو و زێدەباری وێ چەندێ ژی ل دووڤ رێنمایان کار نەدکر، لەورا ئەو کلینیکە ژی ھاتەسزادان و بۆ ماوەیێ سێ رۆژان ھاتە دائێخستن، بۆ زانین ئەڤە بۆ جارا دویێ یە ئەڤ جھە ل سەر رێنما و کێماسیێن د ناڤ وان جھان دا ھاتبوو ئاگەھدارکرن، لەورا ھەتا نوکە ژی نەشیاینە وان کێماتیان چارەسەر بکەن، ئەم ژی نەچارین ل دووڤ رێنمایێن جڤاتا وەزیران سزا بدەین”.