ئه‌ڤرۆ نیوز، نه‌وزاد هلۆرى:

گولا سه‌رنوخینك یان گول شلێر ئێكه‌ ژ گولێن سرۆشتى و ل ده‌ڤه‌رێن چیایى و زوزان دروست دبن، ل هه‌موو چیایێن كوردستانێ هه‌یه‌، به‌لێ زور ب كێمى.ده‌ڤه‌را باله‌كایه‌تى و چیایێ چیكان یان چیایێ كیكان ئێكه‌ ژ وان چیایێن كوردستانێ كو ب سه‌دان هزار گولێن شلێرێ هه‌یى و دیمه‌نێن جوان و سه‌رنجراكێش داینه‌ ده‌ڤه‌رێ.

ئه‌نوه‌ر دوله‌مه‌رى، سه‌رۆكێ سه‌نته‌رێ بارزان بۆ چیاڤانى و ژینگه‌پارێزى بۆ ئه‌ڤرۆ نیوز گۆت: (كوردستان ده‌ڤه‌ره‌كا چیایى و گه‌شتوگۆزارى یه‌، بێ كو مرۆڤ ده‌ستكارى تێدا بكه‌ت بخوه‌ جوانه‌، ل چیایێن كوردستانێ هه‌موو جورێن گولان هه‌نه‌ ب تایبه‌تى گولا سه‌رنوخینك یان گول شلێر كو ئێكه‌ ژ جوانترین گولێن سرۆشتى).

زێده‌تر گۆت: (چیایێ چیكان یان كیكان ل ده‌ڤه‌را باله‌كایه‌تى یا سه‌ر ب قه‌زا چۆمان ب ملیونان گول شلێر هه‌نه‌ و دیمه‌نێن جوان و سه‌رنجراكێش داینه‌ ده‌ڤه‌رێ، مخابن كوردستانێ ئه‌ڤ سرۆشتێ جوان هه‌یه‌ و چ مفایه‌كێ گه‌شتوگۆزارى لێ ناهێته‌ دیتن).

ب گوره‌ى ئاخفتنێن دوله‌مه‌رى، گول شلێر ده‌ستپێكا هه‌یڤا پێنج ل ده‌ڤه‌رێن به‌فرین شین دبیت و ل ده‌ستپێكا هه‌یڤا چوار ژى ده‌ڤه‌رێن چیایى و نه‌ به‌فرین شین دبیت، دیسان ل دوماهیا هه‌یڤا پێنج ل ده‌ڤه‌رێن چیایى و نه‌ به‌فرین دوماهى دهێن و ل ده‌ستپێكا هه‌یڤا شه‌ش ژى ل ده‌ڤه‌رێن به‌فرین دوماهى دهێن و زێده‌تر گۆت: (پێدڤى یه‌ جهێن شوله‌ژێ گرنگیێ ب سرۆشتێ كوردستانێ و ژینگه‌هێ بده‌ن و وه‌كو ئێك ژ ژێده‌رێن گه‌شتوگۆزار بكاربینن، ئه‌و كه‌سێن كو سه‌ره‌دانا ده‌ڤه‌رێن چیایى دكه‌ن پێدڤى یه‌ ب گوره‌ى هه‌ند رێنمایى بچن داكو هه‌ند سرۆشتى تێكنه‌ده‌ن، هه‌ند ژى گیانێ وان سلامه‌ت بیت).