ئه‌ڤرۆ نیوز، نه‌وزاد هلۆرى:
هژماره‌كا هاڤینگه‌هـ و جهێن گه‌شتوگۆزارى ل سنورێ قه‌زا سۆران و ره‌واندوز یێن هه‌ین، هژماره‌كا زۆر یا گه‌شتیارێن هه‌رێما كوردستان و عیراقێ و بیانى سه‌ره‌دانا وان هاڤینگه‌هان دكه‌ن، ب گوره‌ى پێزانینێن رێڤه‌به‌ریا گه‌شتوگوزارا سۆران ل روژانێن جه‌ژنا ره‌مه‌زانا پیروز هه‌تا نوكه نێزیكێ 50 هزار گه‌شتیاران سه‌ره‌دان بۆ كریه.
كامیرا ئه‌ڤرۆ نیوز دیمه‌نێن هه‌ر ئێك ژ هاڤینگه‌هێن ( گه‌لیێ عه‌لى به‌گ، بێخال ، شنگلبان، جوندیان) وێنه دكه‌ت.
ئه‌ڤرۆ نيوز:
ئه‌ڤرو ئێڤاری 19/6/ 2019 به‌رێز (نه‌وفه‌ل به‌ها‌و موسی ) وه‌زیرێ كوچ وكوچبه‌رێن حوكمه‌تا عيراقا فیدرال وشاندێ دگه‌لدا سه‌را كوچكا پارێزگه‌ها دهوكێ دا ژلایێ به‌رێزان فه‌رهاد ئه‌مین ئه‌تروشی پارێزگه‌رێ دهوكێ وبه‌هزاد علی ئاده‌م جێگرێ پارێزگه‌ری واسماعیل محمد احمد هاریكارێ پارێزگه‌ری بو كاروبارێن ئاواره وپه‌نابه‌ران پێشوازی لێ كرن.
دهه‌ڤدیتنه‌كێ دا به‌حسێ ره‌وشا ئاواره وپه‌نابه‌ران ل سنورێ پارێزگه‌ها دهوكێ وئه‌و فشارا ئێخستیه سه‌ر هه‌موو سه‌كته‌رێن خزمه‌تكاری وئه‌و هاریكاریێن ب رێكا پارێزگه‌ها دهوكێ ورێكخراوێن خێرخاز ومروڤایه‌تی و وه‌زاره‌تا كوچ وكوچبه‌ران بو دهێته كرن ب گشتی هاته كرن.
پاش دكونگره‌كێ روژنامه‌ڤانیدا وه‌زیرێ كوچ وكوچبه‌ران سوپاسیا هه‌رێما كوردستانێ وپارێزگه‌رێ دهوكێ وكارگێریا پارێزگه‌هێ وخه‌لكێ ده‌ڤه‌رێ ب تایبه‌تی كر هه‌مبه‌ر ئه‌و پێشوازیا ل ئاواره‌یان كری كو ژ سالا 2014ێ هه‌تا نوكه هه‌موو ره‌نگێن خزمه‌تێ پێشكێشی وان كرین وته‌كه‌زكر كو هاتنا گه‌له‌ك ئاوارا بو سنورێن پارێزگه‌هێ فشاره‌كا مه‌زن ئێخستیه سه‌ر هه‌موو سه‌كته‌رێن خزمه‌تكاری وپشتی ده‌ڤه‌رێن لژێر ده‌ستێ تیرورستێن داعش ژلایێ سوپایێ ئیراقێ وهێزێن پێشمه‌رگه‌ی هاتینه رزگاركرن رێك بو ڤه‌گه‌ریانا ژماره‌كا زور یا ئاواره‌یان هاتیه خوشكرن وهنده‌ك زڤرینه سه‌ر مالێن خو هه‌روه‌سا هنده‌ك ژی ماینه ونوكه ل دوڤ راسپارێن سه‌روك وه‌زیرێن ئیراقێ ئه‌م هاتینه دا ژنێزیك ره‌وشا ئاواره‌یان ل پارێزگه‌ها دهوكێ ببینین وئاریشێن وان بزانین ورێكێ لبه‌ر وان خوشكه‌ین كو ڤه‌گه‌رنه سه‌ر جهێن خو ومه به‌رهه‌ڤیێن خو كرینه كو ل روژێن بهێت دێ كوژمه‌كێ پاره‌ی ئه‌وژی ملیونه‌ك و(500) هزار دینارن دێ ل سه‌ر هه‌ر خێزانه‌كا ئاواره به‌لافكه‌ین.
هه‌روه‌سا گوت: مه پروژه‌كێ دی هه‌یه ئه‌م رێكێ ل به‌ر ڤه‌گه‌ریانا ئاوارا خوشكه‌ین وپێدڤیێن وان یێن ژیانێ ل باژێرێن وان بو دابینكه‌ین بو وێ یه‌كێ ب ئارامی ڤه‌گه‌رنه سه‌ر جهێن خو.
ژلایێ خوڤه پارێزگه‌رێ دهوكێ بخێرهاتنا شاندێ وه‌زاره‌تا كوچ وكوچبه‌ران كر وته‌كه‌زكر كو دان وستاندن ل دور ره‌وشا ئاواره وپه‌نابه‌ران هاتنه كرن وسوبه‌هی 20-6-2019 لیژنا بلندا كوچ وكوچبه‌را ل ئاڤاهیێ پارێزگه‌هێ دێ كومبیت وب تێر وته‌سه‌لی دێ به‌حسێ ئاریشێن ئاوارا وپه‌نابه‌ران ل سنورێ پارێزگه‌هێ هێته كرن چونكو هه‌تا نوكه 21 كه‌مپێن ئاواره وپه‌نابه‌ران هه‌نه وپترژ 42هزار خێزانان دناڤ دا دژین وژڤێ ژمارێ پتر ژی ل ده‌رڤه‌ی كه‌مپا دژین وئه‌ڤ سه‌روبه‌ره دخوازیت كو هاریكاریا وان پتر بهێته كرن وته‌كه‌زكر كو ئه‌وا دشیان دابیت دێ پارێزگه‌ها دهوكێ هه‌ڤكاریێ دگه‌ل وه‌زاره‌وتا كوچ وكوچبه‌ران كه‌ت بو چاره‌سه‌ركرنا ئاریشێن ئاواره وپه‌نابه‌ران.
ئەڤرۆ نیوز ؍ عەلی حاجی :
ئەڤرۆ چار شەمبێ ۱۹/٦/۲۰۱۹ سەنتەرێ زاخۆ یێ رەوشەنبیری سیمنارەکا فلکلوری بۆ رێکێش ئامێدی ب ئامادەبونا هەژمارەکا نڤێسەر و رەوشەنبیر وخەلکێ دەڤەرا زاخۆ سازکر.
فەرهاد حاجی؍بەرپرسێ سەنتەرێ زاخۆ یێ رەوشەنبیری بۆ ئەڤرۆ نیوز دیار کر پشتی ڤەقەتیانەکا کورت ژئەگەرێ جەژنا رەمەزانا پیروز ؍ ئەڤرۆ سمینارەکا فلکلوری ل دۆر گوتنێن مەزنان ل دەڤەرا بەهدینان هاتە سازکرن .
رێکێش ئامێدی ئیمزا ل سەر چار بەرگێن پەرتوکا خوە کر ئەوا بناڤێ فەرهەنگا گوتنێن مەزنان ؍ نڤێسەرێ پەرتوکا ناڤبری زێدەتری ٤۲ سالان مژوولی بەرهه‌ڤکرنا ڤێ پەرتوکێ بوو ب هەر چار بەرگێن خوه‌ڤە کو زێدەتر ژ هەشت هزار گوتنێن مەزنان ب خوەڤە دگریت.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ چارشه‌مبى 19/6/2019 پێشوازى ل شانده‌كێ بلند يێ حزبا ئيسلامى يا عيراقى كر ب سه‌رۆكاتيا ئه‌ياد سامه‌رايى سكرتێرێ گشتيێ حزبێ.
د كۆمبوونه‌كێ دا ره‌وشا عيراقێ وده‌ڤه‌رێ وگوهۆرينێن د ناڤ پرۆسا سياسى يا عيراقى هاتن ئالوگۆركرن، هه‌روه‌سا به‌حسێ ره‌وشا پارێزگه‌ها نه‌ينه‌وا وپرۆسا ئاڤه‌دانكرنا مووسلێ وره‌وشا خه‌لكێ وێ پارێزگه‌هێ هاته كرن.
هه‌ر د وێ كۆمبوونێ دا مه‌ترسيێن هزرا توندره‌ويێ وسه‌رهلدانا تيرۆرستێن داعشێ هاته به‌حسكرن ول دۆر وێ چه‌ندێ هه‌ماهه‌نگى وهشيارى هه‌موو لايه‌كى ب پێدڤى هاته زانين.
د پشكه‌كا دى يا وێ كۆمبوونێ دووپاتى ل پێشڤه‌برنا په‌يوه‌نديێن د ناڤبه‌را هه‌ردولا دا وهاريكارى وهه‌ماهه‌نگيا په‌رله‌مانى د ناڤبه‌را پارتى ديموكراتى كوردستان وحزبا ئيسلامى يا عيراقى هاته كرن.
ئه‌ڤرۆ نيوز:
شێخ سه‌باح ئه‌حمه‌د جابر ئه‌لسه‌باح ئه‌ميرێ وه‌لاتێ كوێتێ ئه‌ڤرۆ چارشه‌مبى 19/6/2019 ب رێيا ته‌له‌فۆنێ په‌يوه‌ندى ب سه‌رۆك مه‌سعود بارزانى كر.
د وێ په‌يوه‌نديا ته‌له‌فۆنى دا ئه‌ميرێ كوێتێ خوه‌شحاليا خوه ده‌ربرى ب وێ پێشڤه‌چوونا سياسى كو ل ئاستێ هه‌رێما كوردستانێ وهه‌روه‌سا په‌يوه‌نديێن هه‌ولێرێ وبه‌غدا هاتينه پێش وهيڤيا سه‌ركه‌فتنێ وپێشكه‌فتنا زێده‌تر بۆ گه‌لێ كوردستانێ خواست.
سه‌رۆك بارزانى سوپاسيا ئه‌ميرێ كوێتێ كر وب خێر هاتنا وى ژى كر كو ب سه‌ره‌دانه‌كێ ئه‌ڤرۆ گه‌هشتيه به‌غدا.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ چارشه‌مبى 19/6/2019 پێشوازى ل ئه‌ياد عه‌لاوى سه‌رۆكێ ئيئتيلافا نيشتمانى يا عيراقى وسه‌رۆكێ مينبه‌رێ عيراقى وشانده‌كێ دگه‌لدا كر.
ئه‌ياد عه‌لاوى ئارمانجێن مينبه‌رێ عيراقى رۆهنكرن وراگه‌هاند كو مينبه‌ر لايه‌نه‌كێ به‌رفرهه‌يه ژ كه‌سايه‌تيێن ميانره‌و ونيشتمانپه‌روه‌ر وكار بۆ وێ چه‌ندێ دكه‌ت هه‌موو پێكهاتێن نه‌ته‌وى وئاينى يێن عيراقى يه‌كسان بن.
عه‌لاوى پێزانينا خوه بۆ رۆلێ ئه‌رێنى وكاريگه‌ر يێ سه‌رۆك بارزانى دياركر وگۆت” رۆلێ جه‌نابێ هه‌وه ل سه‌ر ئاستێ عيراقێ وكوردستانێ گه‌له‌ك يێ كاريگه‌ر بوو ويێ به‌رچاڤه ونوكه بۆ پاراستنا ديموكراسى ل عيراقێ ومه هه‌موويان گه‌له‌ك زێده‌تر پێدڤى ب رۆلێ هه‌وه يێ هه‌ى”.
ئەڤرۆ نیوز، نەوزاد ھلۆری:
ژ ئەگەرەکێ نەدیارە ئاگر بەربوویە چەند گوندێن سنوورێ ناحیا گرعەزێر یا سەر ب قەزا شنگالێ و ھەتا نوکە ژی نەھاتیە کونترولکرن، رێڤەبەرێ ناحیا گرعوزێر ژی بو ئەڤرۆ نیوز دیارکر کو ھەتا نوکە نێزیکێ ھزار خانیان ھاتینە سوتن.
جەلال خەلو، رێڤەبەرێ ناحیا گرعوزێر بو ئەڤرۆ نیوز گۆت: (ژئەگەرەکێ نەدیار ئاگر ب چەند گوندەکێن سنوورێ ناحیا گرعوزێر یا سەر ب قەزا شنگالێ کەفتیە و ھەتا نوکە ژی بەردەوامە و نەھاتیە کونترولکرن).
زێدەتر گۆت: (ژ ئەنجامێ ئەوی ئاگری، ئاگر گەھشتیە دناڤا گوندان دا و نێزیکێ ھزار خانیێن وەلاتیان ھاتینە سوتن، ئاگر نێزیکێ ھژمارەکا زور ژ خانیێن دن دبیت، ئەڤە زێدەباری وێ یەکێ کو ریژەیەکا زورا گەنمی ھاتیە سوتن و پوش و پاوان و ژینگەھا دەڤەرێ ژی ھەمی ھاتە سوتن و بەردەوامە ژ سوتنێ).
ناڤبری ھەلویستێ حوکمەتا عیراقێ شەمبزارکر کو ھەتا نوکە چو تیمەکا ڤەمراندنا ئاگری رەوانەیێ دەڤەرێ نەکرینە و زێدەتر گۆتک (پێدڤی یە جھێن شولەژێ ب زوترین دەم بگەھنە دەڤەرێ ئەگەر دێ زیانێن ئاگری گەلەک زێدەتر بو و بیتە ئەگەرێ ئاوارە بوونا ھژمارەکا زورا خەلکی، نوکە خەلک بزاڤێ دکەت ئاگری کونترول بکەت کو نەگەھیتە گوندێن وان بەلێ جھێ داخێ یە ل گوندێ خەرباتێ قەوالا و گرعوزێر ھژمارەکا زورا خانیان سوتن)
ئەڤرۆ نیوز، ئەمیر ئەترووشی:
ل کەمپا شاریا یا ئاوارێن شنگالێ پرتووکخانەک ھاتیە ڤەکرن و رۆژانە ھژمارەکا زۆرا خەلکی سەرەدانا وێ دکەن بۆ خواندنا پرتووکان، بزاڤ دھێنە کرن ھەمان پرتووکخانە ب شێوەکێ گەرۆک ل چەند کەمپ و دەڤەرێن دی بھێنە گێڕان و ڤەکرن.
خەلیل پوکو، بەرپرسێ پرتووکخانا کەمپا شاریا بۆ ئەڤرۆ نیوز خویا کر، خواندن ژێدەرێ رەوشەنبیریێ یە، پشتی داخوازیەکا زۆر ژ لایێ گەنجان ڤە ھاتیە کرن ل سەر ڤەکرنا پرتووکخانەکێ، ب پشتەڤانیا چەند سەنتەر و رێکخراوان پرتووکخانەک ھاتە ڤەکرن کو ھەموو جۆرێن پرتووکان وەک (سیاسی، قانوونی، رۆمان، ھۆنەری) ب زمانێن عەرەبی و کوردی و ئینگلیزی و لاتینی تێدا ھەنە، ھەروەسا دێ بزاڤێ کەین پرتووکخانێن گەرۆک ژی ل ناڤ کەمپان و دەڤەرێن دی ڤەکەین و بگێڕین، دا کو خەلکێ مە یێن حەزا خواندنێ ھەین ل چ دەڤەران بن مفای ژێ وەرگرن.
گۆتژی: “وەک ھەر تشتەکی دی یێ گرنگ خەلکێ مە پێدڤی ب خواندنا پرتووکان ھەیە، نە ب تنێ ئاواران، بەلکو گەنجێن جڤاکی ھەموو پتر بزاڤێ بکەن دەمێ خوە ب خواندنا پرتووکان ڤە ببۆرینن و نە ب تشتێن بێ مفا ڤە، دا کو ئاستێ وان یێ رەوشەنبیری پێش بکەڤیت و بھێز بکەڤیت”.
ئەڤرۆ نیوز، عەلی حاجی:
پشتی دەست ب سەر رێژەکا مێلاکا مریشکێ یا وەلاتێ تورکیا دا ل باژێرێ زاخۆ ھاتیە گرتن، بنگەھێ چاڤدێریا بازرگانی وێ مێلاکا دەست ب سەر دا ھاتیە گرتن دھاڤێژیتە د ناڤ خابیری دا ل سەنتەرێ باژێری.
جەگەر، بەرپرسێ بنگەھێ چاڤدێریا بازرگانی ل زاخۆ بۆ ئەڤرۆ نیوز ئاشکرا کر، پشتی وان دەست ب سەر ٧٠ کیلۆیێن مێلاکا مریشکێ یا وەلاتێ تورکیا دا گرتی و گۆت: “وەکو پشتەڤانیکرن ل بەرھەمێ ناڤخوەیی ئەو بەرھەمە ھاتیە قەدەغەکرن کو بھێتە د ناڤ ئاخا ھەرێما کوردستانێ دا، پشتی مە دەست ب سەردا گرتی، مە پەیوەندی ب لژنا ھەڤپشکا زاخۆ کر بۆ وێ چەندێ ب چ رەنگ سەرەدەریێ دگەل وێ مێلاکێ بکەین، وان ژی بۆ مە دیار کر، ئەم وێ مێلاکێ بھاڤێژینە د ناڤ ئاڤا خابیری دا، داکو ماسی مفای ژێ ببینن، لەورا مە ژی ھەمان پێنگاڤ ھاڤێژت و ئەو مێلاکە ھاڤێتە د ناڤ ئاڤا خابیرێ زاخۆ دا”.
گۆتژی: “ئەو مێلاکا دەست ب سەر دا ھاتیە گرتن، ب چو رەنگا یا دەم ب سەرڤەچووی نەبوو، ژ ئەگەرێ نەبوونا بەڕادان مە نەشیا وێ مێلاکێ د ناڤ عمبارێن خوە دا بھێلین، ژ بەر کو دا بھێن کەڤیتە وێ میلاکێ”.
ئەڤرۆ نیوز، بارزان مزووری:
کچەک بناڤێ”جیلان سەفەر یوسف” ل گوندێ بیرێ یێ سەر ب ناحیا ئەترووش ڤە ئەڤرۆ ١٩/٦/٢٠١٩ دکەڤیتە بەرکارەبا موالیدێ و گیانێ خوە ژ دەست دا.
د. حاجی حسێن، رێڤەبەرێ نەخۆشخانا شێخان ب وەکالەت بۆ ئەڤرۆ نیوز دیار کر، ئەڤرۆ تەرمێ کچەکێ گەھشتە نەخۆشخانا شێخان و ل دووڤ زانیاریێن دەستپێکی ژ لایێ کەسوکارێن وان ڤە کەفتبوو بەر کارەبێ پشتی پشکنین بۆ لەشێ وێ ھاتینە کرن بۆ نۆشداریا داد ل پارێزگەھا دھۆکێ ھات رەوانەکرن بۆ ئاشکرا بوونا ئەگەرێن مرنا وێ
ژ لایەکێ دی ڤە کەسەکێ نێزیکی مالباتا وێ ل گوندێ بیرێ بۆ ئەڤرۆ نیوز گۆت: “جیلانێ جلک ل سەر بانی رادکرن، وایرەکێ کارەبا موالیدێ ل سەر بانێ وانرا دبۆریت، ئەو وایرە یا رویس بوو و کەفتیە سەر رستا جلکان و رستە بوویە کارەب دەمێ جیلان دەستێ خوە دکەتێ ئێکسەر کارەب دگریت و دکوژیت”.
گۆتژی: “ژیێ جیلانێ ١٨ سالە و ئاکنجیا گوندێ بیرێ یە و ھێشتا کچە”.
نيشاندان