ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ دوشه‌مبى 17/6/2019 پێشوازى ل شانده‌كێ هه‌ڤپه‌يمانيێ بۆ ديموكراسيێ ودادپه‌روه‌ريێ ب سه‌رۆكاتيا ئارام قادر سه‌رۆكێ هه‌ڤپه‌يمانيێ كر.
د كۆمبوونه‌كێ دا به‌حسێ ره‌وشا سياسى يا عيراقێ وده‌ڤه‌رێ وپرۆسا سياسى ل هه‌رێما كوردستانێ هاته به‌حسكرن وگاڤێن بۆ پێشخستنا پرۆسا سياسى ودابينكرنا سه‌قامگيريێ هاتن گفتوگوكرن.
ئه‌ڤرۆ نيوز:
جڤاتا پاريزگه‌ها ديالا برياردا هه‌ر كه‌سێ گلێشى ل جهێن كۆمكرنا گلێشى ب سۆژيت بهێته ده‌سته‌سه‌ركرن.
ره‌عه‌د مه‌سعودى، ئه‌ندامێ جڤاتا پارێزگه‌ها ديالا بۆ مالپه‌رێ (بغداد اليوم) راگه‌هاند” ل چه‌ند رۆژێن بۆرى ل باژێرێ به‌عقوبه (سه‌نته‌رێ پارێزگه‌ها ديالا) وده‌ڤه‌رێن ده‌وروبه‌ر هنده‌ك كه‌سێن نه‌نياس ئاگر به‌ردا هژماره‌كا جهێن بن ئاخكرنا گلێشى وبوو ئه‌گه‌رێ په‌يدابوونا دوكێلا ژه‌هراوى ل سه‌ر رووبه‌ره‌كێ به‌رفرهه ژ باژێرێ به‌عقوبه وئه‌ڤ چه‌نده بوويه جهێ نه‌رازيبوونا هژماره‌كا مه‌زن يا وه‌لاتيێن وى باژێرى وزيان ژى ب هه‌لگرێن چه‌ندين نه‌خوه‌شيان گه‌هاند”.
دياركر ژى” جڤاتا پارێزگه‌ها ديالا بريار دايه هه‌ر كه‌سێ ئاگرى به‌رده‌ت جهێن گشتى يێن كۆمكرنا گلێشى وبن ئاخكرنا وى، ئێكسه‌ر بهێته ده‌سته‌سه‌ركرن، ژبه‌ر مه‌ترسيا وێ چه‌ندێ ل سه‌ر ژينگه‌هێ وساخله‌ميا گشتى”.
ئەڤرۆ نیوز، بارزان مزووری:
سەردار یەحیا عەبدولعەزیز، قایمقامێ قەزا شێخان و نوێنەرێ لقێ 20 پارتی ل شێخان و لژنێن دانا کارەبا موالیدان ل سنوورێ قەزا شێخان ئەڤرۆ 17/6/2019 کۆمبوونەک ل دۆر ئەرزانکرنا بھایێ ئەمپێرێ کارەبا موالیدەی ل سنوورێ قەزا شێخان ئەنجام دا.
شیمال عادل میرۆ، ئەندامێ جڤاتا پارێزگەھا دھۆکێ بۆ ئەڤرۆ نیوز گۆت: “پشتی گازندێن وەلاتیێن قەزا شێخان گەھشتینە جڤاتا پارێزگەھا دھۆکێ ل دۆر گرانبوونا بھایێ ئەمپێرێ کارەبا موالیدەی، مە دووڤچوون ل دۆر بابەتی کر، ل دووماھیێ ئەم گەھشتینە وێ راستیێ کو بەلێندەرێ موالیدان ل قەزا شێخان گرێبەستەک دگەل لژنا بلند یا موالیدێن پارێزگەھا دھۆکێ کری و ئەم ژی ل سەر وی بابەتی نەھاتینە ئاگەھدارکرن، پشتی ئاشکرابوونا گرێبەستا د ناڤبەرا ھەردو لایان دا، دیاربوو ھزار دینارێن ھەر ئەمپێرەکێ کارەبێ ل قەزا شێخان ژ ھەموو قەزایێن دی زێدەترە”.
گۆتژی: “پشتی دووڤچوونێ و ب رازیبوونا بەلێندەری، دوھی د کۆمبوونەکێ دا بڕیار ھاتە دان ئەو ھزار دینارێ زێدە بھێتە بڕین و بھایێ ئەمپێری وەکو ھەموو قەزایێن دی یێن پارێزگەھا دھۆکێ لێ بھێت”.
ئەڤرۆ نیوز، عەلی حاجی:
ب ھەلکەفتا 43 سالیا شەھیدکرنا رێبەر مەلا حسێن کو ل 23/4/1976 ژ لایێ رژێما بەعسڤە ھاتبوو شەھیدکرن، لقێ ھەشت یێ پارتی ل زاخۆ رێورەسمەکێ رێزگرتنێ ل بنەمالا شەھیدێ ناڤبری بەرھەڤ کر.
شڤان شێخو، بەرپرسێ پشکا جەماوەری ل لقێ ھەشتێ پارتی دیموکراتی کوردستان بۆ ئەڤرۆ نیوز دیار کر، شەھید (رێبەر مەلا حسێن) شانەکا نھێنی د ناڤ سەنتەرێ باژێرێ زاخۆ دا ھەبوو و د ھەمان دەم دا پێشمەرگێ شۆڕەشا گولانێ ژی بوو و گۆت: “ژ بەر وێ خەباتا شەھیدێ ناڤبری کری، مە وەکو لقێ ھەشت ب فەر زانی ب ھەلکەفتا شەھیدکرنا وی رێورەسمەکێ رزگرتنێ ل بنەمالا وی ساز بکەین و خێزانا شەھیدی خەلات بکەین، دیسا ھەر د رێورەسمێ دا پرتووکەکا تایبەت ب خەباتا شەھیدێ ناڤبری و ب پشتەڤانیا لقێ ھەشت ھاتیە چاپکرن؛ ھاتە بەلاڤکرن و تێدا بەحس ل چەندین قووناغێن ژیانا وی و خەباتا وی یا نەتەوی ھاتیە کرن، ئەم پشتەڤانیێ ل وێ چەندێ ژی دکەین پەیکەرەک بۆ شەھید رێبەر مەلا حسێن و شەھید کوردستان سالحی ل باژێرێ زاخۆ بھێتە دانان”.
ئەحمەد سەعید، بەرپرسێ لقێ زاخۆ یێ ئێکەتیا قوتابیێن کوردستانێ بۆ ئەڤرۆ نیوز گۆت: “ئەم شەھید رێبەر مەلا حسێن ب شەھیدێ ئێکەتیا قوتابیێن کوردستانێ و سمبۆلا وێ دزانین، ژ بەرکو د بیاڤێ قوتابیان دا خزمەتەکا بەرچاڤ ھەبوویە، مە پێشنیار کری یە د ناڤ زانکۆیا زاخۆ دا پەیکەرەک بۆ شەھیدان (رێبەر مەلا حسێن) و (کوردستان سالحی) ب شێوەکێ جوان و رێکوپێک بھێتە دانان، د نوکە دا مە پێدڤی ب رازیبوونا زانکۆیا زاخۆ ھەیە ھەتا بشێین کارەکێ ب ڤی رەنگی ئەنجام بدەین”.
ئەڤرۆ نیوز:
وەزارەتا ئاڤەدانکرن و ئاکنجیکرنێ یا حوکمەتا ھەرێما کوردستانێ دیار کر، ئەو دێ گوھۆڕینان د دروستکرنا رێیێن ھەرێما کوردستانێ دا کەن و بریکارێ وەزارەتێ ژی بۆ کارێن رێیان دبێژیت: ئێدێ رێیێن ھەرێما کوردستانێ دێ ب تەکنولۆژیەکا نوو و بکارئینانا پۆلیمەری ھێنە دروستکرن.
سدقی ئامێدی، بریکارێ وەزارەتا ئاڤەدانکرن و ئاکنجیکرنێ بۆ کارێن رێیان خویا کر، پشتی چەندین کۆمبوونان، بڕیار ھاتیەدان ھەموو ئەو رێیێن ل سەرانسەری ھەرێما کوردستانێ تێکچووین، بھێنە نووژەنکرن و چەند رێیێن نوو ژی بھێنە دروستکرن، ژ وان ژی رێیا ھەولێر بۆ دھۆک و ھەولێر بۆ کۆیە و چەند رێیێن دی کو حوکمەتا ھەرێما کوردستانێ پارە یێ بوو تەرخانکری و بڕیارە ژی پتریا رێیان د ئەڤ سالە دا بھێنە نووژەنکرن.
سقی ئامێدی بۆ مالپەرێ فەرمی یێ پارتی دیموکراتی کوردستان گۆت: “ئەو رێیێن ژ نوکە و پێڤە دھێنە دروستکرن؛ ب تەکنولۆژیەکا نوو دێ ھێنە دروستکرن و پۆلیمەر تێدا دێ ھێتە بکارئینان، ئەڤە ژی دێ بیتە ئەگەر کو ئێدی رێ بۆ دەمێ چەندین سالان تێک نەچن، نوکە ژی رێیا باتێل بۆ زاخۆ و رێیا کۆیە ژی پۆلیمەر تێدا بکار دھێت”.
ئەڤرۆنیوز، عەلی حاجی:
دو وەلاتیێن گوندێ بێرمانێ ل باکوورێ کوردستانێ د خابیری دا خەندقین و ھەتا نوکە لاشێ وان نەھاتیە دیتن، لەو وەلاتیێن گوندێ ناڤبری داخواز ژ خەلکێ باتیفا کریە ھەردەما لاشێ وان ھەردو کەسان دیت؛ ئاگەھدار بکەن.
محەمەد موراد ئاکنجیێ ناحیا باتیفا بۆ ئەڤرۆ نیوز دیار کر، گوندێ بێرمانێ نێزیکی سنوورێ گوندێ مە یە و بەری سێ رۆژان گەنجەکێ ژیێ وی د ناڤبەرا 30 ھەتا 35 سالیێ و زارۆیەکا 12 سالی د ئاڤا خابیری دا ل سنوورێ وەلاتێ تورکیا خەندقینە و لاشێ وان نەھاتیە دیتن، ژ بەرکو ئاڤ یا بۆشە، لەو رەنگە لاشێ وان ھات بیتە د سنوورێ کوردستانێ دا و گۆت: “ژ بەر ڤێ چەندێ گوندیێن گوندێ بێرمانێ داخواز ژ مە کری یە ھەردەما لاشێ وان ھەردو کەسا ھاتە دیتن؛ وان ئاگەھدار بکەین، داکو لاشێ وان بۆ گوندی َوان بھێتە ڤەگوھاستن”.
گۆتژی: “مە پۆلیس و جھێن پەیوەندیدار و خەلکێ دەڤەرێ ل سەر ڤێ روودانێ ئاگەھدار کرینە و دێ دھاریکار بین بۆ لێگەڕیانا تەرمێ وان ھەردو کەسان ھەتا کو دبینین”.
ئەڤرۆ نیوز:
سەرۆک وەزیرێن راسپاردی یێ ھەرێما کوردستانێ راگەھاند ھەو ھەست ل دەف ھەموو لایەنێن سیاسی ھەیە یێن ئەڤرۆ دگەل دا کومبووین پێخەمەت پێکئینانا کابینەیا نوو یا حوکمەتێ بەری دەمێ وێ یێ قانوونی، و سوپاسیا تەڤگەرا گۆران ژی کر.
بەری دەمەکێ کێم ئەڤرۆ رۆژا دوشەمبی ١٧-٦-٢٠١٩ پشتی بدووماھی ھاتنا کومبوونا مەسرور بارزانی راسپاردیێ پێکئینانا کابینەیا نوو یا حوکمەتا ھەرێمێ دگەلا تەڤگەرا گۆران د کونگرەکێ رۆژنامەڤانی دا دیارکر سوپاسیا ھەلویستێ تەڤگەرا گۆران دکەین د ڤی ماوێ بوری دا پێکڤە بووین و ھیڤیا مە ئەوە بەری دەسپێکرنا دەمێ بھێنڤەدانا پەرلەمانێ کوردستانێ ئەو پێکھاتەیا کابینەیا نوو پێشکێشی وان بکەت داکو رازەمەندیێ ل سەر بکەن.
ناڤھاتی ئەو چەندە ژی دیارکر ئەو ل وێ باوەرێ یە ھەڤالێن گۆران دێ سیڤیێن وەزیرێن خوە بزووترین دەم پێشکێشی حوکمەتێ کەن، دەربارەی ھەلویستێ لایەنێن سیاسی ژی گۆت: ئەو گەلەک خوشحالە پشتی ئەڤ دیدارە دگەل لایەنێن سیاسی ئەنجامداین و ھەموویان ب بەرپرسیارانە بەرامبەر زوو پێکئینانا کابینەیا نوو یا حوکمەتێ ھەستێ خوە دەربریە.
ئەڤرۆ نیوز، نەوزاد ھلوری:
دەمەکێ کێم بەری نوکە کچەکا دێرەلووکێ ژ ئەگەرەکێ نەدیار خوە ھاڤیتە د رووبارێ زێ دا،ھەتا نوکە چارەنڤیسێ وێ نەدیارە.
کەس و کارەکێ وێ کچێ، بو ئەڤرۆ نیوز گوت: (دەمەکێ کێم بەری نوکە کچەکا مە بناڤێ ھنداڤ فەرھاد دژیێ ١٦ سالیێ دا، خوە ھاڤێتە دناڤا رووبارێ زێ دا، خەندقی).
زێدەتر گۆت: (ھەتا نوکە چارەنڤیسێ وێ نەدیارە، پیچەکێ ژ روویێ دروونی نەیا دروستە).
میلازم ئێحسان سەنعان، بەرپرسێ بەرەڤانیا باژێری ل دێرەلوک بو ئەڤرو نیوز گوت: (ب گورەی پێزانێن کەسوکارێن کچێ، کچەکا وان ل مال دەرکەڤتیە و قەستا رووباری کریە و پاشان خوە ھاڤێتیە ئاڤێ دا، نوکە تیمێن مە گەھشتینە جھێ روودانێ و مژولێ لێگەریانێ نە).
ئه‌ڤرۆ نيوز:
لیژنا دووڤچوونا بازاری ژ قائیمقامیا قەزا دهوکێ، ئەڤرو(۲۰۱۹/٦/۱۷) سەرەدانا شەش جهێن فروتنا کەرستێن چاندنێ ل سەنتەرێ باژێرێ دهوکێ کرن.
یوسف محه‌مەد حەسەن ژ لیژنا دووڤچوونا بازاری دیارکر كو د گەریانا ئەڤرۆ دا، جهێ ئاراس یێ فروتنا کەرستێن چاندنێ ژ بەر ب سەرڤەچوونا مولەتا کارکرنێ هاتە داخستن و گۆت: “دو دەرمانێن ژ دەرڤەری رێنمایان ل چەندین جهان هاتنە دەستەسەرکرن”.
نيشاندان