PKK و پارتی دیموکراتی کوردستان- ئیران رێککەڤتن
ئه‌ڤرۆ نيوز:
ئەندامەکێ سەرکردایەتیا پارتی دیموکراتی کوردستان- ئیران راگەھاند کو پشتی چەندین کۆمبوونێن د ناڤبەرا ھەر دو ئالین د دووماھیێ دا رێککەڤتن ھاتیە کرن و PKK نھا ھەموو ھێزێن خوە یێن چەکداری ل وێ دەڤەرێ کێشاینە کوپێشمەرگێن مە لێ بوون و ھەروەسا مە ھێزەکا دی یا مەزن بۆ وێ دەڤەرێ ھنارتیە و ئێدی ئەم دێ دەست ب خەباتا چەکداری ژی کەین.
سدیق دەرویشی ئەندامێ سەرکردایەتیا پارتی دیموکراتی کوردستان- ئیران بۆ رۆژناما ئەڤرۆ دیار کر کو پشتی روودانا کێلەشینی پارتیا مە ھەردەم رژد بوو کو نابیت شەرێ کورد ل گەل کوردی بھێتە کرن و ژ بۆ وێ یەکێ ژی مە گەلەک جاران سەرەدانا قەندیلێ کر و د ئەنجاما وێ یەکێ ژی چەندین جاران شاندێن PKK سەرەدانا مە کرن و ھەڤدیتن ھاتنە کرن و گۆت: (چەندین ھەڤدیتن و دانوستاندنان ھاتنە کرن و د ئەنجام دا ئەم گەھشتینە رێککەڤتنێ و ئەو یەک ل گۆر من پێنگاڤەکا گەلەک گرنگە، چونکو نھا زەمینا شەرێ براکوژیێ ل مەیدانێ ھاتە راکرن و ھەروەسا PKK ھێزێن خوە یێن سەربازی ل وێ دەڤەرێ ڤەکێشان و مە ژی ھێزەکا دی یا مەزن رەوانەی وێرێ کریە و ئەم بەرھەڤیان دکەین کو گۆر پێشھاتێن نوو ل ئیران و رۆژھەلاتێ کوردستانێ بزاڤێ بکەین).
ئەندامێ سەرکردایەتیا پارتی دیموکراتی کوردستان- ئیران د بەردەوامیا ئاخڤتنا خوە دا ئەو یەک ژی دیار کر کو نھا ھێزێن مە ل وان جھان بنەجە بووینە کو یێن بەرێ PKK بکار دئینان و ھێزێن مە ل چەندین دەڤەران چووینە ناڤ ئاخا رۆژھەلاتێ کوردستانێ، لێ PKK چو ئاریشە بۆ مە دروست نەکرینە و ل گۆر رێککەڤتنێ سەرەدەری دھێتە کرن و ئەم ھیڤیدارین کو ئەو رێککەڤتنە ھەتا دووماھیێ بەردەوام بیت و ھەر دو ئالی ژی بشێن ھاریکاریا ھەڤدو بکەن و چو ئالۆزیان بۆ ھەڤدو دروست نەکەن و گۆت: (د دەمێ روودانا کێلەشینێ ژی مە دیار کربوو کو PKK دۆژمنێ مە نینە و دۆژمنێ مە داگیرکەرێن ئاخا کوردستانێ نە و مە دڤێت ل دژی وان شەری بکەین، ژ بەر ھندێ ژی رژدبوونا پارتیا بۆ دانوستاندنان و چارەکرنا ئالۆزیێ ب رێیا دانوستاندنێ گەھشتە ئەنجامەکا باش و ئەڤرۆکە ئەم دشێین بێژین کو ئاریشە چارە بوویە و ئەم دێ دەست ب کار و خەباتا خوە بکەین).
سەبارەت ب چالاکیێن وان بۆ رۆژھەلاتێ کوردستانێ و ئیرانێ ژی ناڤھاتی دیار کر کو رەوشا نھا یا دەڤەرێ وەک سالێن بۆری نینە و گوھۆرینێن بلەز ل رۆژھەلاتا ناڤین دروست دبن، ل ئیرانێ ژی رەوش دھێتە گوھۆرین و مە ژی دڤێت وەک پارتەکا سەرەکی ل رۆژھەلاتێ کوردستانێ بۆ ھەر گوھۆرینەکێ بەرھەڤ بین و ئەم دێ گرنگیەکا مەزن بدەینە خەباتا سیاسی و رێکخستنی و بێگومان ل رەخ وێ دێ خەباتێ مە یێ سەربازی ژی ھێتە بەرفرەھکرن و گۆت: (نھا د گەلەک بیاڤان دا ل رۆژھەلاتا ناڤین دەلیڤەکا زێرین بۆ کوردان ھاتیە پێش، ھەر پێشڤەچوونەک ل پارچەکێ کوردستانێ کاریگەریا خوە ل پارچێن دیتر دکەت، ل رۆژھەلاتێ کوردستانێ ژی پشتی سەرھلدانا ل مھابادێ و گەلەک باژارێن دی رەوش ھاتیە گوھۆرین و ئەڤرۆکە پێدڤیا خەلکێ مە ب ھێزەکا سەربازی یا ب ھێز ھەیە کو بشێت د ھەر رەوشەکا نەخواستی دا بەرەڤانیێ ژ خەلکی بکەت و ئەم ژی دێ ل گۆر بەرنامەکا دارێتی دەست ب خەباتا خوە بکەین).
ناڤھاتی د دووماھیا ئاخڤتنا خوە دا ئەو یەک ژی دیار کر کو دەم ھاتیە ھەموو پارتێن کوردستانی ھاریکاریا ھەڤدو بکەن و ل سەر بنەمایێ بەرژەوەندیێن نەتەوی پێڤکە کار بکەن و بێگومان دڤێت ستراتیژیەکا نەتەوی بھێتە دانان و ژ بۆ وێ یەکێ ژی فەرە کۆنگرێ نەتەوی بھێتە گێران و بێگومان ب گێرانا وی کۆنگرەی دێ گەلەک پرسێن د ناڤبەرا ھێزێن کوردستانی ھێنە چارەکرن و گۆت: (ئەم وەک پارتی دیموکراتی کوردستان- ئیران بەرھەڤین د ھەر رەوشەکێ دا ھاریکاریا برایێن خوە بکەین و ژ بۆ گێرانا کۆنگرێ نەتەوی و دروست کرنا بەرەیەکێ ل رۆژھەلاتێ کوردستانێ ھەتا نھا مە خەباتەکا مەزن کریە و ژ ئەڤرۆکە پێڤە ژی دێ خەباتا مە یا بەردەوام بیت).
