رێككەفتنا 11 ئادارێ دەستكەفتا خەبات و قوربانیدانا كوردستانییان و شۆڕەشا مەزن یا ئیلۆنێ بوو
مەكتەبا سیاسی یا پارتی دیموكراتی كوردستان ب هەلكەفتا سالڤەگەڕا 55 یا رێككەفتنا 11 ئادارا 1970 پەیامەك بەلاڤكر و ئەڤە دەقێ وێ یە:
دیرۆكا هەڤچەرخ یا بزاڤا رزگاریخوازا گەلێ مە ل سەردەمێن دژوار و سەختدا پەیامەكا راست و دروست یا نەتەوەیی و نیشتمانی بوو، هەر قۆناغەك ژی ژ وێ بزاڤێ وەكو پێدڤییەكا دیرۆكی و چارەنڤیسساز بوو.
دەستپێكرنا شۆڕەشا ئیلۆنا مەزن ل وی سەردەمێ دژوار دا وەكو روودانەكا گرنگ رۆل و سەنگێ بزاڤا رزگاریخوازیێ بۆ قۆناغەكا سیاسی یا پێشكەفتی ڤەگۆهاست ب جۆرەكی ل سەر مەیدانا سیاسی یا ناڤخوەیی و جیهانیدا ئەو بزاڤا شۆڕەشگێری وەكو هێزەكا كاریگەر و خودان بڕیار شیا رۆلێ خوە بگێریت و چەندین دەستكەفتێن گرنگ و دیرۆكی ژی ب دەستڤەبینیت ژوان ژی: رێككەفتنا 11 ئادارا 1970.
رێككەفتنا (11 ئادارێ)، كو د ناڤبەرا سەركردایەتییا شۆڕەشێ ب رێبەرییا بارزانیێ نەمر و حوكمەتا وی دەمی یا ئیراقێ هاتیە ئیمزاكرن، دەستكەفتەكێ بەرهەمدارێ دەرئەنجامێ خەبات و خۆڕاگری و قوربانیدانا رۆلێن كوردستانێ و شۆڕەشا مەزن یا ئیلۆنێ بوو.
وێ رێككەفتنێ كاریگەرییا مەزن هەبوو ل سەر بزاڤا مە یا رزگاریخوازی و نەتەوەیی و نیشتمانی، هەم وەك دیكیۆمێنتەكا سیاسی و قانوونی هاتە نیاسین و هەم ژی ژبەر وێ چەندێ ئێكەم جار بوو حوكمەتا ئیراقێ بهێتە نەچاركرن دانپێدانێ ب مافێن سیاسی و نەتەوەیی و ئیداری یێن گەلێ مە بكەت، هەروەسا پەنایێ ببەتە دانوستاندنانێ بۆ چارەسەركرنا پرسا كوردی ل ئیراقێ.
تایبەتمەندییا وی دەستكەفتێ مەزن د وێ چەندێ دایە پەیداكرنا دەلیڤە و رەوشەكا نوو یا دانوستاندنێ و ئاشتەواییێ، هەتا دەمەكی ژی دوماهی ب شەڕ و كوشتار و مالوێرانیێ ئینا، هەروەسا چەند بڕیارەكێن مەبدەئی و راست ژی هاتنە دان سەبارت پرسا نەتەوایەتی ل ئیراقێ، هەروەسا پێنگاڤێن بەرچاڤ هاتنە هاڤێتن بۆ ب دەستڤەئینانا مافێن مە ژوان: بڕیاردان ل سەر ئۆتۆنۆمیێ ل كوردستانا ئیراقێ و زمانێ كوردی ژی بوو دوەمین زمانێ فەرمی و چەندین دەستكەفتێن دی.
رێككەفتنا (11 ئادارێ) ل سەر ئاستێ ناڤخوەیی و دەرڤە دەنگڤەدانەكا سیاسی هەبوو و دەلیڤەیەكا دی پەیداكر بۆ ناساندنا رەوایەتییا خەباتا گەلێ مە بۆ گەهشتنێ ب ئارمانجێن مە و ب هێزكرنا بنەمایێن دیموكراسیێ و پێكڤەژیانێ د ناڤخوە دا، هەر لەوما ژی ئەو رێككەفتنە پێنگاڤەكا ب مفا بوو بۆ هەموو گەل و پێكهاتەیێن جودا یێن وی وەلاتی.
ژ ئالییەكێ دی ڤە ئەو روودانا گرنگ رۆل و سەنگێ بزاڤا رزگاریخوازا كوردی بۆ قۆناغەكا سیاسی یا پێشكەفتیتر ڤەگۆهاست ب جۆرەكی ل سەر مەیدانا سیاسی یا ناڤخوەیی و جیهانیدا وەك هێزەكا كاریگەر و خودان بڕیار رۆلێ خوە گێرا.
رۆل و پلان و حیكمەتا بارزانیێ نەمر د ئیمزاكرنا رێككەفتنا (11 ئادارێ) ئەو هیڤییە بدەستڤەئینا و ئەو سۆزە بجهئینا بۆ ڤەكرنا دەرگەهەكێ نوویێ ئازادیێ و سەرفەرازیێ و نەچاركرنا حوكمەتا ئیراقێ بۆ بجهئینانا بەندێن رێككەفتنێ.
رێككەفتنا (11 ئادارێ) كو پشتی زنجیرەیەكا شۆڕەش و بەرخۆدان و خۆڕاگرییان هاتە ب دەستڤەئینان و ل وێ قۆناغێ بناغەیەكێ راست و دروست ژی بۆ چارەسەركرنا كێشەیا كوردی و ب هێزكرنا ئێكڕێزیێ و رێكخستنا ناڤمالا كوردی دارشت، هەروەسا باشتركرنا ژیانا هەڤوەلاتییان و رەوشا ژیارا وان و پرۆسەیا ئاڤەدانیێ.
ئارمانجا سەرەكی و ستراتیژی یا سەركردایەتییا سیاسی یا پارتا مە وی دەمی بجهئینانا ئێك ب ئێك یا بڕگەیێن وێ رێككەفتنێ بوو وەكو دەستپێكا قۆناغەكا نوو و پاشەڕۆژەكا گەش و بەرهەمدار بۆ گەلێ مە، بەلێ حوكمەتا ناڤەندی یا وی دەمی ل ئیراقێ بەرۆڤاژی ژ بجهئینانا بەندێن وێ رێككەفتنێ پەشێمان دبوو. ب هەموو شێوەیەكی نەدخواست رێككەفتن بگەهیتە ئەنجامەكی، لەوما بەردەوام بوو د رەتكرنا كورد یبوونا كەركووكێ و ئەنجامدانا سەرژمێرییا ئاكنجییان ل وان دەڤەرێن پترییا وان كورد بوون، هەروەسا گوهۆڕینا دیموگرافیا ئاخێ و شێواندنا واقعێ جیۆگرافی و نەتەوەیی و دابڕینا وان ژ ئاخا كوردستانێ، ل گەل وێ چەندێ ئەو رێككەفتنە بوو بناغەیەكێ راست و دروست یێ پرۆسەیێن دانوستاندنێ و گەنگەشێ، كو شۆڕەشا كورد ل گەل حوكمەتا ناڤەندییا ئیراقێ ئەنجامداین.
ب ڤێ هەلكەفتا دیرۆكی، ئەم ل پارتی دیموكراتی كوردستان، وەكو هەردەم دوپاتی ل سەر بنەمایێن سەرەكی دكەین، دوپاتیێ ل سەر روانگەها راستەقینەیا نەتەوەیی و نیشتمانی یا خوە دكەین، دوپاتیێ ل سەر رێكخستنا ناڤمالا كوردستانی دكەین ب جۆرەكی ئەم هەموو ئالی ل سەر پرسێن ستراتیژیێن كوردستانێ، د بەرگریێ ژ مافێن مە یێن رەوا و دستووری و ئاخا مە و دەستكەفت و قەوارەیێ مە یێ نیشتمانی هەڤئاراستە و هەڤگۆتنار بین و بزاڤێن رژد و دلسۆزانە بكەین ژ پێخەمەت چارەسەركرنا كێشەیان و ئەم هەموو ئالی بەرپرسیارانە بەرژەوەندییا بلند یا خەلكێ كوردستانێ ل بەرچاڤ وەربگرین و ئەركێ مە یێ بەراهیێ پاراستنا ئاخ و خەلكێ كوردستانێ و ڤی قەوارەی و دەستكەفتێن مە بیت.
بیرەوەرییا رێككەفتنا (11 ئادارێ) یا هەڤدەمە ل گەل سالڤەگەڕا ئازادكرنا باژێرێ هەولێرێ (11 ئادارا 1991) ب وێ هەلكەفتێ پیرۆزباهییەكا گەرم ل رۆلێن خۆڕاگرێن باژێرێ هەولێرێ یێ دێرین و پایتەختێ هەرێما كوردستانێ دكەین، هیڤیدارین هەردەم د ئارامیێ و پێشكەفتنێ دا بن.
ل بیرەوەرییا رێككەفتنا (11 ئاداراێ) پیرۆزباهییەكا گەرم ل جەماوەرێ دلسۆزێ كوردستانێ دكەین، سەرێ رێزێ بۆ شەهیدێن رێكا رزگاری و سەربخوەییا كورد و كوردستانێ د چەمینین، سلاڤ و رێز بۆ بنەمال و كەسوكارێن سەربلندێن شەهیدێن مە یێن نەمر.
