عارف روشدی: هیڤیدارین ل خولا بهێت یا پەرلەمانێ هەرێما كوردستانێ ببیتە خودان دستوور
شیرەتكارێ مەكتەبا سیاسییا پارتی دیموكراتی كوردستان راگەهاند: هەلبژارتنێن ئەڤێجارێ یێن پەرلەمانێ كوردستانێ دێ گرنگییا خوە یا تایبەت هەبیت و هیڤیدارم د خولا ئەڤێجارێ یا پەرلەمانێ كوردستانێدا، هەرێما كوردستانێ ببیتە خودان دستوور و ئێدی بیێ دستوور نەمینیت.
عارف روشدی، شیرەتكارێ مەكتەبا سیاسییا پارتی دیموكراتی كوردستان ل دۆر هەلبژارتنێن پەرلەمانێ كوردستانێ گۆت » ئەو سەرنجێن پارتی ل سەر بڕیار و قانوونا هەلبژارتنێن پەرلەمانێ هەبوون، د سیاسی نەبوون، بەلكو تێبینیێن قانوونی بوون ل سەر ئەوان كێماسیێن كو هەبوون، چونكە نابیت پارتی ب هەبوونا ئەوان هەموو كێماسیێن هەین بچیتە د ناڤ پڕۆسەیەكا هەلبژارتنان، هەرچەندە هەموو تێبینیێن پارتی نەهاتنە چارەسەركرن، بەلێ ژ پێخەمەت بەرژەوەندییا وەلاتییان و پاراستنا سەروەرییا هەرێما كوردستانێ بڕیاردا پشكدارییەكا كار و كاریگەر هەبیت بۆ هەلبژارتنێن خولا شەشێ یا پەرلەمانێ كوردستانێ».
گۆت ژی» هەلبژارتنێن ئەڤێجارێ یێن پەرلەمانێ كوردستانێ، دێ هەلبژارتنێن چارەنڤیسساز بن و دێ ئەوێ راستیێ دیاركەت كا كیش ئالی دلسۆز و خەمخۆرێ راستەقینەیێ وەلاتییان بوو، لەوما هیڤیدارم هەموو ئالی ئەنجامێن هەلبژارتنان وەكو خوە قەبوول بكەن».
راگەهاند ژی» هیڤیدارین هەموو خەلكێ كوردستانێ ل دەمێ دەنگدانێ ئەو راستییە ل بەرچاڤ بن كا كیش ئالیێ سیاسی ل حوكمەتێ و ل كارێ سیاسی د خەما داكۆكیكرنێ بوو ژ گرەنتیكرنا مافێن خەلكێ كوردستانێ، لەوما دەنگدانێ گرنگییا خوە یا هەی و هەر دەنگەكی بهایێ خوە یێ هەی».
رۆهنكر ژی» هیڤیدارم ل خولا نوو یا پەرلەمانێ كوردستانێ، هەرێما كوردستانێ ببیتە خودان دستوور و ئێدی بێی دستوور نەمینین، چونكە هەكە مە دستوورەك هەبا، دا پشكەكا مەزن ژ كێشەیێن هەین، یان نە دهاتنە روودان یان دا ب ساناهی هێنە چارەسەركرن».
