ل دەمێ بهێت دێ كارتێكرنا شیعەگەریێ ل سەر شنگالێ دیاربیت
جێگرێ سەرۆكێ دەستەیا بلندا بنگەهێ لالش یێ رەوشەنبیری و جڤاكێ د هەڤپەیڤینەكێدا دیار كر:» گوهۆرینێن دیموگرافی ل شنگال دێ دروست بن، ب دیتنا من دەستهەلات نوكە ل شنگال دەستهەلاتا مەزهەبەكی یە ب تایبەتی ژی شیعە دەستهەلاتا وان یا زالە، لەورا ژی پشتی چەند سالێن بهێت دێ كارتێكرنا شیعەگەری ل سەر شنگال دیاربیت، ئەو كار ل سەر بجهئینانا بەرنامە و پرۆگرامەكێ دارشتی بۆ گوهۆرینا دیموگرافیا شنگال دكەن».
د. سەعید خودێدا، جێگرێ سەرۆكێ دەستەیا بلندا بنگەهێ لالش یێ رەوشەنبیری و جڤاكێ بۆ رۆژنامەیا ئەڤرۆ دیاركر، دبیت ئەجندایێن دەركی ژی هەبن بۆ بجهئینانا پلان و بەرنامێ گوهۆرینا دیموكرافیا شنگال، ئەڤە مەترسیدارترین پلانە ل سەر شنگال و دێ كارتێكرنەكا گەلەك مەزن ل سەر دەڤەرا شنگال كەت، ئەگەر ئاوارە نەڤەگەرن، گەلەك مەترسی دێ ل سەر شنگال و دەڤەرێن ئێزدیان دروست بن، لەورا پێدڤیە ئاوارە ڤەگەرن و هەموو زیانڤێكەفتێن شنگال بهێنە قەرەبووكرن، دا كو خەلكێ شنگال رێگریێ ل گوهۆرینا دیموگرافیا شنگال بگرن و نەهێلن گوهۆرینا دیموگرافی دروست بیت و پێدڤیە ژیانا خەلكێ شنگال بهێتە خۆشكرن هەتا بشێن ڤەگەرن».
خۆیا ژی كر:» دەڤەرا شنگال د درێژاهیا مێژوویێ دا گەلەك جاران هاتیە جینۆسایدكرن، هەر جارەكێ ژێ كارتێكرنا خۆ هەبوویە و شوونوارێن جینۆسایدێ ل سەر خەلكێ شنگال ماینە، نە ب تنێ دەڤەرا شنگال تووشی جینۆسایدێ بوویە، بەلكو گەلەك دەڤەرێن ئێزدیان جینۆساید تێدا هاتیە كرن، ئەڤە بوویە ئەگەرێ گوهۆرینا دیموگرافیا دەڤەران».
گۆت ژی: جینۆسایدا سالا 2014ێ ل شنگال زیانەكا مەزن گەهاندیە جڤاكێ ئێزدی ل شنگال و گەلەك خێزان نەماینە و ژناڤچووینە، گەلەك خێزان پارچە پارچە بووینە و قەستا دەولەتێن جیهانێ كرینە، ئێزدی ل دەولەتیێن جیهانێ بەلاڤ بووینە و ئەڤە 10 سالن خەلك ئاوارە، ئەڤە بوویە ئەگەر خەلكەك دوور بكەڤیت ژ قوتابخانەیان و پرۆگرامەكێ تایبەت نەبوویە رزگاربوویێن دەستێ تێرۆرستێن داعش بخوینن و جارەكا دێ ڤەگەرنە سەر خواندنا خۆ».
جێگرێ سەرۆكێ دەستەیا بلندا بنگەهێ لالش یێ رەوشەنبیری و جڤاكی دیار كر: «د وارێ سیاسی دا ژی هەتا نوكە رەوشا شنگال یا باش نینە، هیزێن چەكدار یێن جۆدا جۆدا د شنگالدا هەنە، ئەڤە ئەگەر بوویە خەلك هەست ب تەناهیێ ل شنگال ناكەت، ژبەركو ئەو جینۆسایدا رۆژا 3/8/2014ێ ب سەرێ ئێزدیان هاتی بوویە ئەگەر هەتا نوكە ژی خەلكێ شنگال باوەری ب رەوشا شنگال نینە و ئاوارە د بەرهەڤ نینن ڤەگەرن و هەست ب تەناهیێ ناكەن، لەورا ژی ئاوارە ل هەرێما كوردستانێ هەست ب تەناهیێ دكەن و ژبەر ڤێ چەندێ ئاوارە ناڤەگەرن».
