ئاكرێ بۆ قارەمانا خولا كوردستانێ و دهۆك پاشڤە چوو پلا ئێك
تیما تەپا پێی یا یانەیا ئاكرێ بۆ جارا ئێكێ د دیرۆكا خوە دا ناسناڤێ خولا پلا نایابا كوردستانێ ب دەستڤە ئینا سەرباری وەكهەڤییا خوە دگەل خودانێن ئەردی یانەیا چوارقۆرنە بێ گۆل، ژلایێ خوەڤە دهۆك پاشڤە چوو پلا ئێك سەرباری سەركەفتنا وێ، د یاریێن واندا ئەوا دوهی ژ چارچووڤەیێ گەڕا 30ێ و دووماهییا خولێ هاتیە كرن و پەردە ل سەر وەرزێ 2023- 2024 یێ خولا نایابا كوردستانێ هاتە دانان.
تیما یانەیا ئاكرێ خەونا خوە یا 17 سالان كو دبیتە دەستپێكا خولێ بۆ وەرزێ ئەڤ سالە بجهـ ئینا و شیا ب كۆمكرنا 49 خالان سەرێ لیستا خولێ بهێت ژ 13 سەركەفتن، 10 وەكهەڤییان و ب گەهیتە ئارمانجا خوە یا ناسناڤێ ئێكێ د دیرۆكا خوە دا.
ژلایەكێ دیڤە تیما یانەیا دهۆك ب فەرمی پاشڤە چوو پلا ئێك سەرباری سەركەفتنا وێ ل سەر هندرین ب گۆلەكێ بێ بەرانبەر، لێ ئەڤ سەركەفتنە تێرا هندێ نە كر كو خوە ژ رێزا بەری دووماهیێ پارێزیت پشتی ئەو یانەیێن بەری وێ خوە قۆرتالكرین و سەركەفتن ئیناین كو دبیتە جارا سێ د دیرۆكا دهۆكێ دا پاشڤە دچیتە پلا ئێك.
ل دۆر ڤێ دەستكەفتێ دیرۆكی هۆزەڤان زاهد ئەندامێ كارگێری و سەرپەرشتێ تیما یانەیا ئاگرێ بۆ رۆژنامەیا ئەڤرۆ گۆت: سۆپاس بۆ خودێ پشتی ئەوان چەند سالێن مە زەحمەت و پلان دانایین ئەڤرۆ ئەم گەهشتینە ناسناڤێ كوردستانێ، ئەڤچەندە ب كارەكێ كۆم هات بەرپرسێن دەڤەرا ئاكرێ، كارگێرییا یانێ، كادرێ راهێنانێ و یاریزان و زێدەتر جەماوەرێ دلسۆز یێ یانەیێ كو رۆلەكێ مەزن هەمیان هەبووینە، ئەڤرۆ ئاكرێ ب خەونا خوە شادبیت و ببیتە قارەمانا كوردستانێ.
ئەنجامێن یاریێن دی بڤی رەنگی بوون، یارییا زاخۆ دگەل دەربەندیخان ب دووماهی نەهات، سەیدسادق 4-2 رانیە، شێروانە 0-0 پێشمەرگەیا هەولێر، ئارارات 4-3 هەولێر، شەقلاوە 3-2 سۆران، سیروانی نوو 0-1 برایەتی.
پشتی ب دووماهی هاتنا گەڕا 30ێ و وەرزێ 2023-2024ێ هەلوەستێ دووماهیێ یێ خولا پلا نایاب بڤی رەنگی بوو.
1- ئاكرێ 50 خال.
2- پێشمەرگەیا هەولێر 49 خال.
3- شێروانە 48 خال.
4- زاخۆ 42 خال.
5- رانیە 41 خال.
6- سیروانی نوو 41 خال.
7- سەیدسادق 39 خال.
8- چوارقۆرنە 38 خال.
9- دەربەندیخان 37 خال.
10- هەولێر 37 خال.
11- هندرین 37 خال.
12- برایەتی 36 خال.
13- ئارارات 36 خال.
14- شەقلاوە 36 خال.
15- دهۆك 36 خال.
16- سۆران 30 خال.
