24 ڕاهێنەرێن پارێزگەهێ دێ باوەرنامەیا خوە یا ئاسیایی بلند كەن
ل ژێر چاڤدێرییا د. ئەحمەد قاسم سەرۆكێ لژنەیا ئۆلمپی فدراسیۆنا فوتبۆلا ئیراقێ ب هەڤكاری ل گەل فدراسیۆنا فوتبۆلا پارێزگەهێ خولا ئاستێ (B) یا ئاسیایی بۆ 24 ڕاهێنەرێن پارێزگەها دهۆكێ و ئیدارا سەربەخوەیا زاخۆ و چەند ژ هەولێرا پایتەخت ڤەكرییە ئەوا ماوەیێ وێ 21 رۆژان بەردەوامبیت.
نەهلا ئەحمەد ئەنداما كارگێرییا فدراسیۆنا فوتبۆلا پارێزگەهێ گۆت: ئەڤ خولە لدووڤ بەرنامەیەكێ ڕێكخستی بۆ ئەوان ڕاهێنەرێن پێشتر خودانێن باوەرنامەیا (A) یا ئاسیایی هەیی و دڤیان باوەرنامە و ئاستێ خوە پێشبێخن، 24 ڕاهێنەر ژ پارێزگەهێ، ئیدارا سەربەخۆ و هەولێرا پایتەخت پشكدارن، ئەوا ژلایێ وانەبێژێن نێڤدەولەتی و ئاسیایی د.نازم جەبار، سەعەد حافز وانەبێژ و سەرپەرشتێ خولێ، وانەیێن وان ب شێوەیێ تیۆری و پراكتیكی ل یاریگەهێن یانەیا دهۆك و بنگەهێ وەرزش و لاوان رۆژانە دهێنە گۆتن و شرۆڤەكرن.
ژلایەكێ دووڤە ناڤهاتی گۆت: وەكو فدراسیۆنا فوتبۆلا پارێزگەهێ هەر تشتەكێ پێدڤی بۆ سەرئێخستنا ڤێ خولێ لدووڤ شیانان هاتیە بەرهەڤكرن و رۆژانە شاندێن فدراسیۆنێ دناڤا چالاكییا خولا ڕاهێنانێ دایە ژبۆ نێزیك ل سەر بڕێڤەچوونا كاروبارێن خولێ، گەشبینن ئەڤ خولە ژی وەكو یێن پێشتری خوە ب سەركەفتی بڕێڤەچن ب هیڤییا وێ یەكێ هەموو ڕاهێنەرێن پشكدار مفایی ژێ وەربگرن و بكەڤیتە د خزمەتا وەرزشا كوردستانێ ب گشتی دا.
ژلایێ خوەڤە یادگار یونس پشكدارێ خولێ كەیفخوەشییا خوە دیاركر و گرنگییا ڤێ خولێ دا دیاركرن و گۆت: پێخوەشحالین ئەڤ خولە هاتییە ڤەكرن ژبەركو ئەم گەلەك پێدڤی بووین ژبۆ بلندكرنا ئاستێ خوە یێ باوەرنامەیێ و وەرگرتنا شارەزاهیێ و دووماهی پێشهاتەیێن ڕاهێنانێ پێنەڤێت ئەڤ خولە دێ شارەزاهییا مە زێدەتر كەت بۆ كاركرنێ وەكو ڕاهێنەر و خزمەتا وەرزشا پارێزگەها خوە بكەین هەروەسان دێ دەلیڤەیا مە بۆ ڕاهێنەراتیێ ل سەر ئاستێ كوردستانێ و ئیراقێ باشتر كەت، ئەڤە ژی پێنگاڤەكا باشە بۆ پێشئێخستنا ئاستێ خوە، ب دیتنا من ئەڤ خولە دێ كۆمەكا خودان شارەزا و زیرەك بۆ ناڤا وەرزشا فوتبۆلێ دا دیار كەت.
