ئیسماعیل قائانی، پێكئینانا حوكمەتا ئیراقێ ئالۆزتر لێ كر
رۆژنامەیا (سەوت ئەلئیراق) د راپۆرتەكا شلوڤەكاریدا ل دۆر سەرەدانا باسلێكری یا قائانی و پێكئینانا حوكمەتا نوو یا ئیراقێ، نڤیسیە: «پێكئینانا حوكمەتا نوو ل بەغدا، پشتی سەرەدانا مژاوی یا (ئیسماعیل قائانی) فەرماندەیێ فەیلەقا قودس یا سوپایێ پاسداران یێ ئیرانێ، گەهشتییە بەربەستەكا داخستی ب ئاوایەكی كو لڤینێن دیپلۆماسی و ئەمنی یێن قائانی نەبووینە كلیلا ڤەكرنا دەرگەهێن داخستی یێن ناڤمالییا شیعی، بەلكو بەروڤاژی، بووینە ئەگەرێ كووركرنا نەپێكهاتنان و وەلێ كریە كو هەر ئێك ژ جەمسەرێن هەڤرێز سەنگەرێن خۆ قایمتر بكەن و مەرجێن خۆ ل سەر مێزا دانوستاندنێ گرانتر بكەن.»
رۆژنامەیێ ژ زارێ سیاسیەكێ شیعە ئاشكرا كریە: «قائانی دەمێ بەغدا بجهـ هێلای، ئالۆزی د گۆپیتكێ بوون.»
رۆژنامەیێ هەروەسا باس ل وێ چەندێ ژی كریە، د ناڤبەرا ڤێ كێشمەكێشمێدا، نووری مالكی وەك «بەربژارێ بتنێ و بێ جێگر» ناڤێ وی دهێتە گۆتن. ژێدەرێن نێزیك ژ تیما مالكی دوپات دكەن كو «چو ناڤێن دی نینن» و ئەوا د میدیایێ دهێتە بەلاڤكرن، بتنێ «یاریەكا میدیاییە» بۆ تێكدانا یاریێ.
ل هەمبەر دا، بەرەیێ محەمەد شیاع سودانی، كو هێشتا چاڤێ وی ل خولا دوویێ یە، باس ل هندێ دكەن كو مالكی روو ب روویێ زنجیرەیەكا «ڤیتۆیێن نێڤدەولەتی و هەرێمی» بوویە كو دەربازكرنا وان یا مەحالە.
ل دووف راپۆرتێ، ئەوا دیمەن ئالۆزتر كری، ئەوە كو پشتی كۆمبوونێ ل گەل قائانی، هەر ئێك ژ مالكی و سودانی وەسا نیشان ددەن كو رازیبوونا رێبەرێ نوو یێ ئیرانێ ب دەست ئینایە. ئەڤ دژایەتییە د ڤەگێڕاناندا، نیشانا هندێ یە كو تەهران ئێدی نەشێت (یان نەڤێت) ب ئێك بڕیار ئالییەكی ب سەر یێ دی دا سەربێخیت، ئەڤێ چەندێ ژی وەكریە هەر دوو جەمسەر پەنایێ ببەنە بەر «مانۆڕێن سیاسی» بۆ لێدانا هەڤدو.
ژێدەرەكێ ئاگەهدار د ناڤ دانوستاندناندا ئاماژێ ب وێ چەندێ دكەت كو «كوتلەیا هەشت» د ناڤا چارچۆڤەیێ هەماهەنگیێدا (كو پترییا وان هەشت سەركردەیێن ناڤ چارچۆڤەی نە) ب نهێنی كار بۆ جورەكێ «كودەتایا سیاسی» دكەن. پلان ئەوە كو دەسپێكێ گڤاشتن ل مالكی بهێتە كرن خۆڤەكێشیت، و پاشی بەربژارێ جێگر (وەك باسم ئەلبەدری یان یێن دی) ب هەمان دەرد ببەن، دا كو د دوماهیێدا گۆرەپان ژ هەموو كەسێن كەڤن بهێتە چۆلكرن.
رۆژنامەیا ئیراقی باس ل هندێ ژی كریە، مالكی كو یێ ناڤدارە ب «یاریزانەكێ خودان ئەزموون»، ب ساناهی ناكەڤیتە د وی داڤی دا و داخوازا گەرەنتییەكا نڤیسار دكەت كو پشتی ڤەكێشانا وی، هەڤسەنگییا هێزێ تێك نەچیت.
جهێ ئاماژێ یە، ل دەرڤەی بازنەیێ شیعی، فاكتەرێ ئەمریكی ب گرانی یێ ئامادەیە. ڤیتۆیا (ترامپ)ی و بەرهەڤی بۆ سەرەدانا (تۆم باراك)ی، نوونەرێ تایبەتێ ئەمریكا بۆ بەغدا، هەموو هەڤكێشە گوهۆڕینە. ئەجێندایا واشنتۆنێ یا رۆهنە: «رێگری ل هەژموونا تەهرانێ و هەلوەشاندنا میلیشیان.» ئەڤێ چەندێ ژی وەكریە كو شیعە و هندەك ئالیێن كوردی یێن نێزیك ل بەرەیێ مقاوەمێ و سوننەیان، چاڤەڕێی پێشهاتێن توند بن.
