جوتیار عەلی: هێشتا زوویە بەحسێ ناسناڤی بكەین و كاروانەكێ ب زەحمەت بەرانبەری تیمێ یە
تیما باسكێت بۆلا یانەیا زاخۆ بەردەوامە ل سەر ئەنجامێن خوە یێن دلخوەشكەر پشتی شیایی د یارییا خوە یا گەڕا بۆری دا سەركەڤتنێ ل سەر هەڤڕكا خوە قارەمانا وەرزێ بۆری یانەیا دیفاع ئەلجەوی بینیت ب ئەنجامێ70-69 خالان، د یارییەكا پری هەڤڕكی دا و بەرهەڤبوونا جەماوەرەكێ ئێكجار زوور، ئەوا ل یاریگەها ڕێڤەبەرییا وەرزشی یا زاخۆ هاتیە كرن.
یاریێن مایی كەنگی نە
بڤێ سەركەڤتنێ تیما زاخۆ شیا دەربازبوونا خوە بۆ قووناغا هەشتێ مسۆگەر بكەت بەری ئەنجامدانا دو یاریێن دی یێن مایی ژ كۆما خوە ئەوا بڕیارە ئەڤرۆ دێ یارییەكێ بەرانبەر یانەیا عومال نەینەوا ل دەمژمێر شەشێ مەغرەب بكەت، هەروەسان سوبەهی سێ شەمبی زاخۆ دێ ل هەمان دەمژمێر یانەیا غاز ئەلشیمال یا كەركووكی مێڤان كەت.
باسكێت بۆلا زاخۆ بەر ب ناسناڤی دچیت
كوڕێن خابووری پێشڤەهاتە سەرێ لیستا كۆما خوە ب كۆمكرنا 15 خالان و دەربازبوونا خوە بۆ قووناغا هەشتێ مسۆگەر كر، یانەیا دیفاع ئەلجەوی قارەمانا وەرزێ بۆری پاشڤەچوو ڕێزا دویێ ب هەمان خالان لێ كێمترییا تۆماركرنا سكۆرتی، عومال نەینەوا ب 14 خالان ڕێزا سێیێ دهێت، سایبس ب 13 خالان، غاز ئەلشیمال ب13 خالان و نەفت ئەلشیمال ب11 خالان ڕێزێن چارێ هەتا شەشێ دهێن.
ڕاهێنەرێ زاخۆ باوەری ب گەنجان هەیە
د داخویانیەكێ دا ڕاهێنەرێ تیما یانەیا زاخۆ دیاركر هێشتا زوویە بەحسی هەڤڕكییا ب دەستڤە ئینانا ناسناڤێ خولا باسكێت بۆلا ئیراقێ بهێتە كرن ژبەركو كاروانێ وان درێژە و هێشتا قووناغا كۆمان ب دووماهی نە هاتییە.
زێدەتر ناڤهاتی بۆ گۆت: لدووڤ پلانا مە یا ئەڤ سالە ئەم هەڤڕكیێ بكەین و سەركەڤتنان بینن هەتا ب گەهینە ئارمانجا خوە ئەوژی ڕێزێن پێشیێ و ناسناڤی و ئەڤە ژی مافەكێ سرۆشتی یە بۆ هەر یانەیەكێ، بۆ مە گرنگ جارێ ئەم د ڤێ قووناغێ دا دەربازبینە قووناغا هەشتێ یا بهێت و بەرهەڤییان بۆ وێ قووناغێ بكەین، لەوما ژی هێشتا زوویە ئەم بەحس ل ناسناڤێ ئیراقێ بكەین و كاروانێ مە درێژە و دەم بۆ دڤێت هەتا ب گەهینێ، لێ ڕژدین و سۆزێ ددەین هەر ژ دەستپێكێ هەتا دووماهییا خولێ ئەم هەموو شیانیێن خوە ب مەزێخین بۆ سەركەڤتنان.
ژلایەكێ دووڤە ناڤهاتی گۆت: مە تیمەكا خودان شیان و گەنج هەنە ب مۆرالەكا بلند بۆ هەر یارییەكێ دهێنە دناڤ هۆلێ دا، بۆ قووناغا هەشتێ دێ بزاڤێ كەین یاریزانێن پیشەكار بینینە دناڤ ڕێزێن تیمێ دا پێخەمەت بهێزكرنا ئاستێ و تیمێ و ئەم یێ كار ل سەر دكەین بۆ هندێ وەرزێ ئەڤ سالە تیما مە هەڤڕكا ناسناڤی بیت.
بۆ زانین د وەرزێ ئەڤ سالە دا فدراسیۆنا باسكێت بۆلا ئیراقێ شێوازێ هەڤڕكیێ ل سەر ناسناڤێَ گوهۆڕتییە، ئەوا12 یانە پشكدارن و هاتینە بەلاڤكرن ل سەر دو كۆمان، كۆما ئێكێ پێكهاتیە ژ، زاخۆ، نەفت ئەلشیمال، سایبس، دیفاع ئەلجەوی، عومال نەینەوا و غاز ئەلشیمال، یاریێن وێ ل كەركووكێ دهێنە كرن، كۆما دویێ پێكهاتینە ژ دیجلە ئەلجامیعە، نەفت میسان، كارەبا، حللە، ئەلیەقزە و حەشد ئەلشەعبی، یاریێن وێ ل پایتەختێ ئیراقێ بەغدا دهێنە كرن، چار یانە ژ هەر كۆمەكێ دێ دەربازبنە قووناغا هەشتێ پلەی ئۆف ئەوا دێ ل 29 و 30ێ ڤێ مەهێ هێنە كرن.
