بادین حەسۆ: ئەڤ دەستكەڤتە بۆ سەرۆك بارزانی و هەموو پێشمەرگە و مالباتێن شەهیدان دیارییە
كوڕێ باژێرێ شارییا ستیرێ كوردستانی بادین حەسۆ زۆزانی یێ ناڤدار ب شێرێ كوردان شیا ناسناڤەكێ دی ل سەر دەستكەڤتێن خو یێن دیرۆكی د یارییا كیك بۆكسنیگێ دا زێدە بكەت پشتی شیایی د فینالا شەڤا دەربازبووی ژ قارەمانییا نێڤدەولەتی WBC ب دەستڤە بنیت و دبیتە سێیەمین كەمەرا نێڤدەولەتی یا ڤێ قارەمانیێ ب دەستڤە بینیت، ب سەركەڤتنەكا مەزن ل سەر هەڤڕكێ خوە یێ مەكسیكی ڤیكتۆر ڤیسێنتی، د هەڤڕكییا واندا ئەوا ل باژێرێ ئۆبرهاۆزێن یا ئەلمانیا هاتییە كرن.
بادین حەسۆ ب جلۆبەرگێن خەملاندی ب ئالایێ كوردستانێ هاتە د ناڤا گۆرەپانا شەڕی دا و ب پشتەڤانییا جەماوەرێ كوردستانی و مۆرالەكا بلند وسرۆدا نشتیمانیی ئەی ڕەقیب هاتیە گۆتن شیا ب تنێ د ماوەیێ سێ خولەكان دا یاریێ ب دووماهی بنیت و ب دربێ ئێخستنێ ناسناڤێ ڤێ قارەمانیێ ب دەستخوەڤە بنیت.
د داخویانیەكا رۆژنامەڤانی دا قارەمانێ كوردستانی گۆت: ئەڤ دەستكەڤتە دیارییە بۆ سەرۆك بارزانی، هەموو پێشمەرگە و مالباتێن شەهیدان و هەموو خەلكێ كوردستانێ و ئەوێن پشتەڤانییا من دكەن د ڤێ یاریێ دا.
بۆ زانین بادین حەسۆ ژ ئۆلییا ئێزدییان ل دەڤەرا شارییا ژ دایكبوویە و بەر ب وەلاتێ ئەلمانیا چووبوو هەر د ژیێ نەهـ سالی دا هەتا نوكە زێدەتر 100 یاری كرینە ل سەر ئاستێن جودا و شیاییە بێ كەڤتن د سەركەڤتنان دا بەردەوامبیت، ل سالا بووری ژلایێ مەسرۆر بارزانی سەرۆكێ حوكمەتا هەرێمێ ڤە هاتبوو خەلاتكرن ژبەركو شیابوو ناسناڤێ نێڤدەولەتی یێ بۆكسانێ ل ئەلمانییا ب دەستڤە بنیت.
