ئەزموونێن گشتی یێن پۆلا 12 ئامادەیی دەستپێكرن
ئەزموونێن گشتی یێن پۆلا 12 ئامادەیی ب هەموو پشكێن خوەڤە، زانستی و وێژەیی و پیشەیی دوهی 3/6/2023 ب پشكداریا 117 هزار و 364 قوتابیان ل سەرانسەری هەرێما كوردستانێ هاتنە كرن.
ئالان حەمە سەعید، وەزیرێ پەروەردێ یێ حوكمەتا هەرێما كوردستانێ ب مەرەما ژ نێزیك ئاگەهدار بوون ل سەر چاوانیا ئەنجامدانا ئەزموونان، دوهی سەرەدانا ئامادەیا هەسار ل پارێزگەها دهۆكێ كر و د كۆنفرانسەكێ رۆژنامەڤانی دا و گۆت: «ل سەرانسەری هەرێما كوردستانێ 117 هزار و 364 قوتابیان پشكداری د ئەزموونێن پۆلا 12 ئامادەیی دا كرییە، ئەم هیڤیا ئەنجامەكێ باش بۆ هەموو قوتابیان دخوازین، پێدڤیە ل مال و ل هۆلێن ئەزموونان سەقایەكێ ئەرێنی و گونجای بۆ قوتابیان بهێتە پەیداكرن».
وەزیرێ پەروەردێ گۆتژی: «ل پۆلێن زانستی 75 هزار و 39 قوتابی، ل پۆلێن وێژەیی 39 هزار و 113 قوتابی و ل پۆلێن پیشەیی 3 هزار و 12 قوتابی، دێ پشكداریێ د ئەزموونان دا كەن».
ئەحمەد عەبدوللا زۆبێر، بەرپرسێ راگەهاندنا رێڤەبەریا گشتی یا پەروەردا پارێزگەها دهۆكێ، بۆ رۆژناما ئەڤرۆ گۆت: «ب بەرهەڤبوونا وەزیرێ پەروەردێ یێ حوكمەتا هەرێمێ و ماجد سەید سالح، جێگرێ پارێزگارێ دهۆكێ و عومەر عەلی تەها، رێڤەبەرێ گشتی یێ پەروەردێ ل پارێزگەهێ، دەربارەیی چاوانیا ئەنجامدانا ئەزموونێن پۆلا 12 ئامادەیی سەرەدانا قوتابخانا هەسار ل دهۆكێ كر و د سەقایەكێ ئارام دا ئەزموون دهاتنە ئەنجامدان».
ئەحمەد عەبدوللا زۆبێر گۆتژی: «ل پارێزگەها دهۆكێ 529 بنگەه بۆ ئەنجامدانا ئەزموونێن پۆلا 12 ئامادەیی هاتینە ئامادەكرن و 26 هزار و 170 قوتابی ل سەرانسەری پارێزگەها دۆكێ پشكداری د ئەزموونان دا كرییە».