ئەنیس خالد: كادرێ ڕاهێنانێ هاتە دەستنیشانكرن و چاڤەڕێی ڕاهێنەرێ گۆلپارێزانین
قەیس وەیس:
د داخویانیەكێ دا سەرپەرشتێ تیما یانەیا ئافرەتێن دهۆكێ دیاركر ب فەرمی گەهشتنە ڕێكەفتنێ ل گەل كادرێ ڕاهێنانێ بۆ تیما وان یا فوتبۆلێ خوە بەرهەڤكرن بۆ وەرزێ نوو یا خولا نایابا ئیراقێ ل سەر ئاستێ كچان دهێتە چاڤەڕێ كرن هەڤڕكیێن وێ ل ناڤەڕاستا مەها بهێت ب پشكدارییا 14 یانەیان ب شێوەیێ خول بهێتە كرن.
زێدەتر ئەنیس خالد گۆت: پشتی گەنگەشیێن جودا ب فەرمی كادرێ ڕاهێنانێ یێ تیما مە هاتە دەستنیشانكرن ئەو ژی هەر ئێك ژ ئاراز سالح وەكو ڕاهێنەرێ تیمێ، كارزان حەمید وەكو هاریكارێ ڕاهێنەری و رێژین حەجی محەمەد وەكو ڕاهێنەرا شیانێن جەستەیی هاتنە دەستنیشانكرن، د نێزیك دا دێ ل گەل ڕاهێنەرێ گۆلپارێزان كۆمبین و ڕێكەفتنێ كەین، ئەڤە ژی وەكو پێنگاڤەكا بهێزكرنا تیما مە بۆ وەرزێ نوو یا خولا نایابا ئیراقێ ئەوا دهێتە زانین دێ ل 15ێ مەها بهێت دەستپێكەت، ئەم وەكو تاكە یانەیا پارێزگەهێ هەتا نوكە ل سەر ئاستێ كچان پشكدارین..
هەروەسان ناڤهاتی گۆت: ئەڤ پشكدارییە دبیتە یا ئێكێ ل سەر ئاستێ فوتبۆلێ د دیرۆكا یانەیێ دا پشكداریێ بكەت، لەوما ژی مە هەموو بزاڤ كرینە ب ئینانا یاریزانێن باش یێن دەست مە بكەڤن كو پشكدارییەكا سەرفەراز بین و ناڤێ وەرزشا كچێن دهۆكێ بلند بكەین، هەژی گۆتنێ یە دڤێت سپاسیێن بێ سنور ئاراستەیی د. عەلی تەتەر پارێزگارێ دهۆكێ بكەین كو پشتەڤانییا خوە یا تەمام دیاركری و دەرگەهێ پشكداریێ بۆ تیما مە ڤەكری، دیسان سوپاسییا ڕێكخستنا پارتا مە دكەین كو هەردەم پشتەڤانێن وەرزشا كچانە.