بڕيارا سێداره‌دانێ بۆ داعشه‌كى ده‌ركه‌فت كو ده‌ستدرێژيا سكسى كربوو سه‌ر ژنه‌كا ئێزدى
ئه‌ڤرۆ نيوز:
دادگه‌ها تاوانان ل نه‌ينه‌وا بڕيارا سێداره‌دان هه‌تا مرنێ بۆ كه‌سه‌كى كو سه‌ر ب رێكخستيا داعش بوو و پشكدارى د كوشتن و ده‌ستدرێژكرنا سه‌ر ژنه‌كا ئێزدى دا هه‌بوو.
بنگه‌هێ راگه‌هاندنا جڤاتا بلندا دادوه‌ريێ راگه‌هاند كو ئه‌وى تيرۆرستى جلكێن ئه‌ڤغانى ل به‌ر بوون و چه‌ك ژى د ده‌ست دابوو و وه‌كو كارمه‌نده‌كێ هه‌والگه‌ريێ د ناڤ رێكخستيا تيرۆرستى دا هه‌بوو كو پێزانين ل سه‌ر وه‌لاتيان ددان.
بنگه‌هى ئاماژه ب وێ چه‌ندێ ژى كريه كو ئه‌ڤى تيرۆرستى پشكدارى د شه‌ران دا كريه ل ناحيا زۆمار و پێنج كه‌س ژ هێزێن ئه‌منى كوشتينه و ده‌ستدرێژيا سكسى ژى كريه سه‌ر ئێك ژ ژنێن ئێزدى.
هه‌ر ژ به‌ر هندێ ژى ب گۆره‌ى بنگه‌هێ راگه‌هاندنا جڤاتا بلندا دادوه‌ريێ بڕيارا سێداره‌دان هه‌تا مرنێ بۆ وى چه‌كدارێ داعش ده‌ركريه ب گۆره‌ى ماددێ 4 يێ قانوونا نه‌هێلانا تيرۆرێ يا ژماره 13 يا سالا 2005ێ كو ب ره‌نگه‌كێ روون و ئاشكه‌را دانپێدان ب تاوانێن خوه كريه و ديده‌ڤانان ژى به‌حس لێكريه.
