تیپا كانیا میرا دێ هنده‌ك جۆرێن ده‌واتێن نوو كه‌ت
دهۆك، شاكر ئه‌تروشی:
حه‌فت گه‌نجێن قه‌زا سه‌رسنكی، كو هه‌موو برا و پسمامێن ئێكن، گرۆپه‌ك ب ناڤێ (تیپا كانیا میرا) بۆ ڤه‌ژاندن و پاراستنا ده‌واتان ل وێ ده‌ڤه‌رێ دانایه و به‌رنامه‌ك بۆ ئه‌نجامدانا چه‌ند بزاڤ و چالاكیێن فولكلۆری به‌رهه‌ڤكریه.
سه‌روان كامیران نێروه‌یی، سه‌رۆكێ وێ تیپێ، د دیداره‌كێ دا بۆ رۆژناما ئه‌ڤرۆ دبێژیت: ل ناڤ مه نێروه‌یا گه‌له‌ك ره‌نگ و جۆرێن ده‌واتان هه‌نه و هنده‌ك ژوان به‌ر ب نه‌مانێ ڤه دچوون، له‌ورا مه هزركر ئه‌م تیپه‌كێ دانینن و وان ده‌واتان دوباره كه‌ینه ڤه، ژبۆ هندێ دا جاره‌كا دی بهێنه ڤه‌ژاندن و مه‌ترسیا نه‌مانێ ل سه‌ر نه‌مینیت، نوكه گرۆپێ مه ژ حه‌فت كه‌سان پێك دهێت، هه‌موو خه‌لكێ گوندێ سینانه سه‌ر ب ده‌ڤه‌را نێروه‌یا، وه‌كو مه گۆتی ئه‌م هه‌موو ژی برا و پسمامێن ئێكین، به‌ری چه‌نده‌كێ مه پشكداری د به‌رنامه‌كێ ته‌له‌فزیۆنی دا كربوو ل كه‌نالێ وار تیڤی، هه‌روه‌سا مه هنده‌ك كارێن دی ژی بۆ كه‌نالێن نافخوه‌ی كرینه و ئه‌م سوپاسیا مۆختارێ خوه (سه‌بری عه‌بدولره‌زاق نێروه‌یی) دكه‌ین كو هه‌موو ده‌واتان ئه‌و نیشا مه دده‌ت.
ل دووماهیێ گۆت: ئه‌ڤه چار هه‌یڤه مه مووله‌ت وه‌رگرتی لێ هێشتا ئه‌م دبێ ئاڤاهی نه و مه سه‌ره‌دانا هنده‌ك لایه‌نان كریه ژوانا رێڤه‌به‌رێ ناحیێ، لێ هه‌تا نوكه چو بۆمه نه‌هاتیه كرن، له‌ورا ئه‌م پرۆڤێن خوه ل مال دكه‌ین.
