تێنسا مێزێ یا دهۆكێ نوونەرا پارێزگەهێ یە د خولا ئیراقێ دا
چاڤەڕێ دهێتە كرن ل ناڤەراستا مەها نیسانا بهێت هەڤڕكیێن قۆناغا ئێكێ یا خولا پلا نایابا ئیراقێ یا یارییا تێنسا ل سەر مێزێ بۆ پێشكەفتیان ل سەر ئاستێ كوڕان ب شێوەیێ كۆمڤە بوون بهێتە كرن و هەتا نوكە چو جهـ نە هاتینە دەستنیشانكرن، تیما دهۆكێ وەكو نوونەرا ئێكانە یا پارێزگەهێ دێ پشكداریێ كەت.
ل دۆر ڤێ یەكێ بشار رەمەزان راهێنەرێ تیما یانەیا دهۆك بۆ رۆژنامەیا ئەڤرۆ گۆت: ب فەرمی تیما مە دێ پشكداری وەرزێ نوو یێ خولا پلا نایابا ئیراقێ ل سەر ئاستێ پێشكەفتیان كەت ئەوا دێ ل 18ێ هەتا 20ێ مەها بهێت هەڤڕكیێن وێ ب شێوەیێ كۆمڤە بوون ل جهەكی كو دەمەكێ نێزیك دا دێ هێتە دیاركرن، لەوما بۆ وەرزێ نوو دێ ب هەموو شیانێن خوە بەرهەڤییان كەین و ب چار یاریزانێن كوڕێن باژێرێ خوە پشكدارییەكا سەرفەراز كەین، 16 یانە پشكدارن و شێوازێ وێ خولە هەشت یانەیێن ئێكێ دێ دەربازبنە قۆناغا دویێ و پلێتا دەربازبوون بۆ خولا نوخبە یا وەرزێ 2024ێ.
هەروەسان ناڤهاتی گۆت: ب سۆپاس ڤە كارگێرییا یانەیێ بەردەوام پشتەڤانییا تیما مە بوویە و گەشبینن دێ هەڤڕكیێ هەتا دووماهیێ كەین و پلێتا دەربازبوونێ ب دەستڤە ئینن، هەتا نوكە مە پێكهاتیێ خوە دەستنیشان نەكرییە ژبەركو ئەو ژڤانێ بۆ خولێ هاتییە دیاركرن دكەڤیتە د تاقیكرنێن قوتابیان دا، دێ چاڤەڕێ پێشهاتەیێن نوو بین و ئەم بەردەوامین بەرهەڤییان دكەین و هیڤی و ئۆمێدێن مە ژی دەربازبوونە.
بۆ زانین ئەو یانەیێن پشكدار د خولا پلا نایاب دا هەر ئێك ژ، دهۆك، برایەتی، ئەكاد، ئاشتی، سلێمانی، دەربەندیخان، كۆیە، غاز ئەلجنوب، جەیش، سیناعە، نەفت ئەلشیمال، زیقار یا تایبەتمەند، حەشد ئەلشەعبی، ئەلنەجەف، ئەلسەماوە، ئەلدیفاع ئەلجەوی.
