حەسەن شەریفی كلیپەكا نوو بەلاڤكر
زنار تۆڤی:
هونەرمەند (حەسەن شەریف) د دیدارەكێ دا بۆ رۆژناما ئەڤرۆ گۆت: بەری چەند رۆژان من كلیپەكا نوو ب ناڤێ (تەنیرڤان) بەلاڤكر، پەیڤ و مۆزیك یێن (ئەحمەد ئیبراهیم) بوون، مۆزیكا وێ سترانێ ل تۆن ستودیۆ هاتییە تۆماركرن، ئارانجا وێ ژی ژ لایێ رێناس كورداخ ڤە هاتییە كرن و ئەڤە ئێكە ژ سترانێن ئەلبۆما من یا نوو، كارێ وێنەكرن و مۆنتاژكرنێ ژلایێ ئارمانج باكۆزی ڤە هاتییە كرن، هەروەسا نۆشاد كێستەیی هەڤكارێ لۆجستیك و سەركارێ چێكرنا ڤێ كلیپێ بوویە، د ئالیێ سیناریۆیێ ژی دا یێ هاریكاربوویە.
هەروەسا گۆت: من دڤێت ب رەنگەكێ بەردەوام كارێن هونەری یێن باش بەلاڤ بكەم، ل گەل هندێ پەیداكرنا ئەكتەرێن كچ دناڤ كلیپان دا ل دەڤەرا مە كارەكێ ب زەحمەتە، د ڤی واری دا من رەخنە هەنە، هەر چەندە مە دەرچوویێن پەیمانگەها هونەرێن جوان هەنە ل دهۆكێ، بەلێ وەكو پێدڤی پشكدارییێ د كارێن هونەری دا ناكەن، هندەك جاران كارێ دوبارە دهێتە كرن دناڤ كلیپان دا، بەلێ مە دڤێت د بەردەوام بین و كارەكێ ژ هەژی پێشكێشی گەلێ خۆ بكەین، لەوما نەبوونا ئەكتەرێن كچ و بودجەكێ باش بۆ چێكرنا كلیپان ئێكە ژ ئاریشێن ل هەمبەری كارێ مە و بەرهەمەكێ دی یێ مەزن، كو ئەو ژی داستانا عیسێ دەلایە، من چێكریە، ژپەیڤێن هەلبەستڤان ئەدیب چەلكی یە، سترانەكا دیرۆكی یە دەربڕینێ ژ دیرۆكا دەڤەرا بەهدینان دكەت، من لبەرە ل هەیڤا گولانێ وێنە بكەم.