دهۆك بێ جەماوەرێ خوە گەشبینە سەركەفتنێ ب دەستڤە بینت
قەیس وەیس:
دهێتە چاڤەڕێ كرن ئەڤرۆ ژی دو یاریێن دی ژ چارچووڤەیێ هەڤڕكیێن گەڕا 23ێ یا خولا ستێرێن ئیراقێ یا تەپا پێی بهێتە ئەنجامدان، یارییا ئێكێ تیما دهۆك دێ د ناڤ ئەردێ خوە لێ بێ بەرهەڤبوونا جەماوەرێ خوە ل دەمژمێر 6:15 مێڤاندارییا یانەیا نەفت ئەلبەسرا كەت، یارییا دویێ حدود و نەفت ل یاریگەها كەرخ دێ بەرانبەر ئێك راوەستیێن.
تیما یانەیا دهۆك بۆ یارییا دویێ ل دووڤ ئێك دێ بێ جەماوەرێ خوە مێڤاندارییا یانەكا دی كەت ئەوژی نەفت ئەلوەسەت، ئەڤچەندە ژی ژبەر پێگیرییا یانەیا دهۆكێ ب بڕیارێن فیدراسیۆنا فوتبۆلا ئیراقێ پشتی روودانێن یارییا دگەل جەوییە چەند سزاد ل سەر هەردو یانەیان هاتبوونە دەركرن ژ وانا یانەیا دهۆك ب دو یارییان بێ جەماوەر و كۆژمەیێ30 ملیۆن دیناران هاتبوو سزادان.
ئەلهۆیێن چیا ئەو 34 خال كۆمكرین ژ نەهـ سەركەفتن و حەفت وەكهەڤی و شەش خوسارەتی هەنە دێ بزاڤێ كەت سەركەفتنەكا گرنگ و پێدڤی بینت پێخەمەت باشتكرنا هەلوەستێ خوە و خوە ژ پاشڤەچوونێ دووربێخیت، د بەرانبەرا دا تیما نەفت ئەلوەست لاوازترین یانەیە د ناڤ خولێ دا ئەوا ب تنێ 10 خال كۆمكرین ژ 10 وەكهەڤییان ئانكو چو سەركەفتن نە ئیناینە ل رێزا 20ێ و دووماهیێ دهێت، ئەڤچەندە ژی دەلیڤەكە بۆ یاریزانێن دهۆكێ ب شێن سەركەفتنێ بینن و جەماوەرێ خوە ئاشت بكەن پشتی د یارییا بۆری دا بەرانبەر كەرخ بێ گۆل دناڤ ئەردێ خوە دا وەكهەڤ بوویی و دیسان كەفتینە ل بەر نەرازیبوونا جەماوەری ژبەر ئاستێ وان یێ نە چاڤەڕێكر.
د پرێس كۆنفرانسەكی دا عەلی وەهیب هاریكارێ راهێنەرێ دهۆكێ وەكهەڤییا تیما خوە یا یارییا بۆری دگەل كەرخێ ب نە یاچەڤەڕێ كری دابوو دیاركرن و نە بەرهەڤبوونا جەماوەری ئێك ژ ئەگەرێن كارتیكرن ل سەر ئاستێ یاریێ هەبوو و دیاركر بۆ یارییا دگەل نەفت ئەلوەسەت دڤێت قەرەبوو بكەن و رژدن ئاست و ئەنجام ب دەستڤە بینن.
بۆ زانین یارییا زاخۆ دگەل جەوییە بۆ دەمەكێ دی هاتە پاشئخستن ژبەر پشكدارییا كۆمەكا یاریزانێن یانەیا جەوییە دگەل ئۆلمپیێ ئیراقێ پشكدارن، ژ یاریێن دی یێن ئەڤرۆ، حدود- نەفت، سوبەهی كەرخ- ئەلقاسم، زورا- نەفت ئەلبەسرا، نەجەف- ئەمانەت بەغدا.