دهۆك ل بەغدایە و زاخۆ ب پشتگەرمیا جەماوەرێ خوە گەشبینن بۆ سەركەفتنێ
چاڤەڕێ دهێتە كرن ئەڤرۆ و سوبەهی دەهـ یاری ژ هەڤڕكیێن گەڕا 25ێ یا خولا ستێرێن ئیراقێ یا فوتبۆلێ ب ئەنجامدانا چەند یاریێن ئاگرین دێ هێنە كرن، زاخۆ و نەورۆز دێ دناڤ ئەرد و جەماوەرێ خوە ب ئارمانجێن سەركەفتن یانەیێن بەسرایی مێڤان كەن و دهۆك و هەولێر ل باژێرێ بەغدا دێ شەڕێ ب دەستڤەئینانا سێ خالێن یاریێ كەن.
زاخۆ ب مۆرالا بلند دێ شەڕێ سێ خالان كەت
بڕیارە ئەڤرۆ ل دەمژمێر شەشی ئێڤاری تیما یانەیا زاخۆ ل یاریگەها خوە مێڤاندارییا یانەیا مینا یا بەسرایی بكەت د یارییەكا گرنگ دا بۆ كوڕێن خابووری پێخەمەت پاراستنا رێزبەندییا خوە و زێدەتر پێشڤەچوون بۆ رێزێن باشتر، زاخۆ ب سەرپەرشتییا راهێنەرێ خوە یێ قەتەری تەلال ئەلبلۆشی هەتا نوكە شیایە 40 خالان ژ 23ێ یارییان كۆمبكەت ئانكو یارییەك پاشئێخستی هەیە گو ژ سەرجەمێ 10 سەركەفتن و 10 وەكهەڤیان هەنە و سێ خوسارەتی، هەڤڕكا وێ یا ئەڤرۆ تیما مینا خودانا 27 خالانە ل رێزا 13ێ دهێت، بۆچوون هوسا دهێنە دیتن كو یارییا ئەڤرۆ دبیت زاخۆ ئێكلاكەت ئەو ژی ل دووڤ ئاست و ئەنجامێن هەردو تیمان د خولێ دا، سێ ئەگەر هەنە كو هزرا باشترینێ بۆ زاخۆ بیت، یا ئێكێ ئاست و ئەنجامێن زاخۆ ب گشتی گەلەك د باشن و شیابوو دووماهی یاری دا سەركەفتنەكا باش ل سەر كارەبا بینت، یا دویێ ئاست و ئەنجامێن هەردو تیمان زاخۆ باشترە و دووماهی یاری بەرانبەر ئێك بووینە ژ گەڕا 15ێ بوو ل یاریگەها وێ كوڕێن خابووری سەركەفتنەكا ب دو گۆلان ئینابوو، یا سێیێ زاخۆ دێ دناڤ ئەرد و جەماوەرێ خوە دا كەت ئەڤچەندە دێ بیتە پشتگەرمی بۆ یاریزانان و مۆرالا وان بلندكەت بۆ دەستڤە ئینانا سێ خالێن یاریێ.
دهۆك ب هیڤییە د ماوەیێ پێنج رۆژان دا ب گەهیتە خالان شەشێ
بڕیارە سوبەهی تیما یانەیا دهۆك ل یاریگەها ئەلمەدینە ل پایتەختێ ئیراقێ بەغدا ببیتە مێڤانا یانەیا ئەمانەت بەغدا ل دەمژمێر 10:30 شەڤ، تیما دهۆكێ ژی د رەوشەكا باش دایە و رێزبەندیا وێ یا پێنجێ یە ب كۆمكرنا 38 خالان ژ 10 سەركەفتن، هەشت وەكهەڤی و شەش خوسارەتی داینە، ژلایێ خوەڤە ئەمانەت بەغدا خودانا 16 خالانە ل رێزا 19ێ و بەری دووماهیێ دهێت، ئەڤ یارییە بۆ ئەلهۆیێن چیا گەلەك گرنگە و گەشبینن بگەهنە خالا شەشێ د ماوەیێ پێنج رۆژان دا ژبەركو دو یاریێن ل دووڤ ئێك ژ دەرڤەیی یاریگەها خوە ئەنجامدان، پشتی یارییا گەڕا 24ێ شیایی دگەل ئەلقاسم سەركەفتنێ بینت، دهۆك ب سەركێشییا راهێنەرێ خوە ئەحمەد خەلەف ب هیڤینە سەركەفتنا خوە دوباربكەن پشتی د گەڕا 12ێ دا شیابوون ب دو گۆلان دناڤ ئەرد و جەماوەرێ خوە سەركەفتنێ ل سەر ئەمانەت بەغدا بینن.
هەولێر و نەورۆز بەرانبەر ئاستەنگێن زەورا و نەفت ئەلبەسرا
د بەردەوامییا یاریێن ڤێ گەڕێ دا هەردو یانەیێن دی یێن كوردستانی بەرانبەر ئاستەنگێن بهێزن، تیما یانەیا هەولێر ئەوا د رەوشەكا ئالۆز دا دەرباز دكەت دێ ل بەغدا بیتە مێڤانا زەورا، ژلایێ خوەڤە نەورۆز ژی ل یاریگەها خوە دێ مێڤانا نەفت ئەلبەسرا كەت، ژ یاریێن دی یێن مایی، ئەڤرۆ كەربەلا- كارەبا، نەفت ئەلمیسان- ئەلقاسم، شورتە و جەویە، نەجەف بەرانبەر كەرخ، یاریێن سوبەهی تەلەبە- نەفت، حدود- نەفت ئەلوەسەت.
هەلوەستێ گشتی یێ رێزبەندیێ بڤی شێوەیە.
1-شورتە 55 خال.
2-جەوییە 52 خال ژ 23 یاریان.
3-زەورا 43 خال.
4-زاخۆ 40 خال ژ 23یاریان
5-دهۆك 38 خال.
6-نەجەف 37 خال.
7-نەفت 37 خال.
8-نەورۆز 36 خال ژ 23 یاریان.
9-حدود 33 خال.
10-نەفت ئەلمیسان 32 خال.
11-تەلەبە 31 خال ژ 21 یاریان.
12-كارەبا 27 ژ 23 یاریان.
13-مینا 27 خال.
14-كەرخ 24 خال.
15-هەولێر 23 خال ژ 22 یاریان.
16-كەربەلا 23 خال ژ23 یاریان.
17- نەفت ئەلبەسرا 21 خال.
18-ئەلقاسم 17 خال.
19-ئەمانەت بەغدا 16 خال.
20-نەفت ئەلوەسەت 11 خال.
