ستاڤەكێ نوو یێ كادرێ راهێنانێ هاتە دەستنیشانكرن
قەیس وەیس:
د داخویانیەكێ دا سكرتێرێ یانەیا ئافرەتێن دهۆكێ بۆ رۆژنامەیا ئەڤرۆ دیار كر ب فەرمی گرێبەست دگەل ستاڤەكێ نوو یێ كادرێ راهێنانێ بۆ تیما فوتسالێ ل سەر ئاستێ تازەپێگەهشتییان خوە بەرهەڤكرن بۆ خول و قارەمانیێن داهاتی یێن كوردستانێ و ئیراقێ.
زێدەتر سلێمان زەكی گۆت: ستاڤێ نوو پێكهاتییە ژ ئاراز سالح وەكو راهێنەر، سیپەل شوكر هاریكارا راهێنەری و دەریا یونس راهێنەرا گۆلپارێزان بۆ تیما فوتسالێ ل سەر ئاستێ تازەپێگەهشتییان و هەر ل شەڤا دەربازبوویی دەست ب یەكەم راهێنانێن خوە ل هۆلا چالاكیێن وەرزشی و دیدەڤانی ل پەروەردەیا رۆژئاڤا كر خوە بەرهەڤكرن بۆ خول و قارەمانیێن كوردستانێ و ئیراق و نێزكترین قارەمانی دهێتە چاڤەڕێكرن قارەمانییا پێلیستانكە ل هەولێرا پایتەخت، ئەڤ پێنگاڤە ل دووڤ پلانا مە یا دارێشتی یە پێخەمەت بشێن بشێوەكێ باش خزمەتا وەرزشا كچان ل پارێزگەها دهۆكێ بكەین و بۆ هەر یارییەكا د شیان دا بیت بهێتە كرن.
ژلایێ خوەڤە ئاراز سالح راهێنەرێ نوو یێ تیما فوتسالێ گۆت: پێخوەشحالم دگەل یانەیا ئافرەتێن دهۆكێ كارەكێ مەزن و گرنگ بكەین ئەو ژی خزمەتا كچێن وەرزشڤان یێن باژێرێ خوە، پێنەڤێت ب هاریكارییا كارگێریێ و كادرێ خوە یێ راهێنانێ مە بەرنامەكێ رێكخستی دانایە ژبۆ دروستكرنا تیمەكا باش و ئەكادیمی ژ كچێن دهۆكێ بشێن خزمەتا وەرزشا پارێزگەها خوە بكەین، هەروەسان بۆ قارەمانیێن داهاتی باشترین شێوە بەرهەڤییان بكەین، هەرچەندە یا گرنگ بوو مە دانانا بنیاتەكێ رێكوپێك یێ تیمەكێ كو بشێن هەتا دگەهنە تیما پێشكەفتییان نوونەراتییا یانە و پارێزگەها دهۆكێ بكەن.
