سلێمان رەمەزان ئێكانە راهێنەرێ هەرێمێ یە بگەهیتە بلندترین باوەرنامەیا نێڤدەولەتی
راهێنەرێ یارییا تەپا پێی یێ بەرنیاس ل پارێزگەها دهۆكێ و كوردستانێ سلێمان رەمەزان د نوكە دا ل باژێرێ بەغدایە و پشكدارە د خولەكا تایبەت یا باوەرنامەیا A pro یا نێڤدەولەتی دا و گەهشتییە قۆناغا شەشێ ژ كورسێ پێش دووماهیێ كو دهێتە هژمارتن راهێنەرێ ئێكانە یێ كوردستانێ گەهشتییە ڤێ قۆناغێ و گەشبینە بلندترین باوەرنامەیا نێڤدەولەتی ب دەستڤە بینت، ل دور دووماهی پێشهاتەیێن پشكدارییا وی ناڤهاتی بۆ رۆژنامەیا ئەڤرۆ خویاكرییە.
ل دەستپێكێ ناڤهاتی گۆت: ئەڤ خولە ل سەر ئاستێ باوەرنامەیا A PRO كو بلندترین باوەرنامەیە ل سەر ئاستێ جیهانێ و حەفت قۆناغان ب خوەڤە دگریت كو 27 راهێنەرێن ئیراقی ژ وانا دو یێن مسری نە و وانەبێژێن نێڤدەولەتی یێن وەلاتێ بەلجیكایێ نە كو شێوازێ وێ تیۆری و پراكتیكی دهێنە كرن، پرانییا وانەیێن وان یێن تەكتیكی كو دێ چەوا شێی راهێنانێن تیمێ كەیە یێن كاریگەر دناڤ یاریگەهێ دا، هەروەسان وانەیێن تایبەت یێن شرۆڤەكرنا یاریێ و شرۆڤەكرنا كۆم یا یاریزانان وەكو خواندنەكا تەسەل، ئەڤ خولە دبیتە قۆناغێن پێنجێ و شەشێ نە و بڕیارە هەردو قۆناغێن دووماهیێ ل مەها ئەیارا بهێت ب دووماهی بهێت كو هەر قۆناغەك بۆ ماوەیێ حەفت رۆژان بەردەوامن.
بۆ زانین راهێنەر سلێمان رەمەزان ئێك ژ راهێنەرێن خودان شیانە دگەل تیما تەپا پێی یا یانەیا دهۆك شیابوو تیما وێ ژ خولا پلا ئێكا ئیراقێ دەربازبتە پلا نایاب، هەروەسان چەندین ناسناڤێن خول و كۆپا هەرێما كوردستانێ دگەل یانەیێن زێرەڤانی و زاخۆ ب دەستڤە ئیناینە
