سه‌میر زاخۆیی: هه‌تا نوكه (93) سترانبێژان په‌یڤ و ئاوازێن من گۆتینه
زاخۆ، شاكر ئه‌تروشی:
هونه‌رمه‌ندێ ناڤدارێ كورد ماموستا (سه‌میر زاخۆیی) د دیداره‌كێ دا ل باغچێ مالا خوه، كو ئه‌م مێهڤانێن وی بووین، بۆ رۆژناما ئه‌ڤرۆ گۆت: ئه‌ز ب چو ره‌نگان یێ په‌شیمان نینم كو هاتیمه دناڤ جیهانا ستران و مۆزیكێ و هه‌ر ل ده‌ستپێكا هاتنا من بۆ ناڤ هونه‌ری كو ل سالا (1963) بوو، من هاریكاریا هژماره‌كا زۆرا سترانبێژ و مۆزیكژه‌نان كریه و هه‌تا نوكه(93) سترانبێژان ژ هه‌ر چار پارچێن كوردستانێ من ستران بۆ چێكرینه، ئانكو په‌یڤ و ئاوازێن من گۆتینه و هه‌تا نوكه ژی یێ به‌رده‌وامم و دووماهی كارێ من به‌ری چه‌ند رۆژان من سترانه‌ك دایه سترانبێژ (ئاراز به‌رواری) كو ژ په‌یڤێن سه‌یفوللا محه‌مه‌د و ژ ئاوازا منه.
هه‌روه‌سا گۆت: ده‌مه‌كه مژوولی كۆمكرنا وان هه‌لبه‌ستامه یێن كو من ل سالێن حه‌فتێیان و هه‌تا نوكه نڤیسین، من ل به‌ره بكه‌مه پرتووك و به‌لاڤ كه‌م، هنده‌ك ژوان هه‌لبه‌ستان هاتینه ئاوازكرن و بووینه ستران، هنده‌ك ژی ماینه، هه‌روه‌سا به‌رده‌وام ئه‌ز خۆلێن فێربوونا مۆزیكێ ڤه‌دكه‌م و گه‌له‌ك ژ مۆزیكژه‌نێن به‌رنیاس ل به‌ر ده‌ستێ من فێربووینه.
ل دووماهیێ گۆت: به‌ری چه‌ندین سالان سۆزه‌ك ب مه هاتبوو دان كو هێشتا ئه‌م دساخ په‌یكه‌ره‌كی بۆمه چێكه‌ن و مه كۆمه‌كا وێنان ژی گرتن، لێ هه‌تا نوكه وه‌ك كریار چو دیارنه‌بوویه، ئانكو سۆزا خوه بجه نه‌ئیناینه.
