سپێده بناڤی: من بزاڤا كری هنده‌ك به‌رهه‌مێن جودا و نوو نیشابده‌م
دهۆك، شاكر ئه‌تروشی:
ب هه‌لكه‌فتا شۆڕه‌شا 26 گولانێ، لژنا ناوچا ئازادی یا پارتی دیمۆكراتی كوردستان، دوهی به‌ری نیڤرۆ پێشانگه‌هه‌كا په‌یكه‌ری و كارێن ده‌ستی بۆ كادرا خوه (سپێده سه‌عید بناڤی) ل هولا لژنێ رێكخست و ئه‌و پێشانگه‌ه ژ لایێ كوڕه‌ك و كچه‌كا بچووك ڤه كو بابێ وان ل شه‌ڕێ داعش شه‌هید بوویه، هاته ڤه‌كرن.
سپێده بناڤی، خودانا وێ پێشانگه‌ها بۆ رۆژناما ئه‌ڤرۆ گۆت: ئه‌ڤه پێشانگه‌ها من یا پێنجێ یه، پتری پێنجی كه‌ڤالان كو هه‌موو ب داری هاتینه چێكرن من نیشاداینه، من بزاڤا كری كارێ ڤێ پێشانگه‌هێ یێ جودا و نوو بیت، چنكو د پێشانگه‌هێن بۆری دا من كه‌ڤالێن شێوه‌كاری ژی نیشاداینه، ئه‌ڤه دو جاره ئه‌ز ڤان به‌رهه‌مان كو ئه‌و ژی چێكرنا په‌یكه‌رانه ب داری و هنده‌ك كه‌رستێن دی نیشا دده‌م، هیڤیا من ئه‌وه وه‌ك خانمه‌كا ڤی باژێری ئه‌ز بشێم ل دووف شیانێن خوه خزمه‌ته‌كا بچووك بۆ هونه‌رێ كوردی پێشكێس بكه‌م.
ل دووماهیێ گۆت: هه‌رچه‌نده وه‌ك خواندن من دوارێ هونه‌ری دا نه خواندیه، به‌لكو ئه‌ڤه حه‌زا منا زارۆكینیێ بوو، مالبات هه‌موو ژی پشته‌ڤانن، له‌ورا هه‌تا نوكه یا به‌رده‌وامم و بۆ سالێن بهێن ژی دێ مه به‌رهه‌مێن باشتر هه‌بن.
