سێ دھۆکیان چاڤدێریا ھەلبژارتنێن سودانێ کر
ئەڤرۆ:
ماوەکەیە ھەلژارتنێن وەلاتێ سودانێ ب پشکداریا چەندین پارتێن سیاسی دەست پێکرینە، بۆ جارا ئێکێ شاندەکێ ئاست بلند کو ژ سێ ئەندامێن پەرلەمانێ کوردستانێ و عیراقێ پێک ھاتبوون، کو خەلکێ باژێرێ دھۆکێ نە وەک چاڤدێر پشکداری د ھەلبژارتنێن ڤی وەلاتی دا کرینە.
رێناس جانۆ، ئەندامێ پەرلەمانێ عیراقێ ژ فراکسیۆنا پارتی دیموکراتی کوردستان کو خەلکێ باژێرێ دھۆکێ یە و نوکە ل وەلاتێ سودانێ یە وەک چاڤدێرێ ھەلبژارتنان، بۆ رۆژناما ئەڤرۆ گۆت: چوونا مە بۆ وەلاتی سودانێ ب مەرەما پشکداریکرنێ یە د چاڤدێریا ھەلبژارتنان دا، شاند پێک ھاتبوو ژ سێ کەسان ل سەر ئاستی پەرلەمانێ عیراقێ و کوردستانێ کو ھەر سێ ژ باژێرێ دھۆکێ بووینە، ( ریناس جانو ، محەمەد عەلی یاسین ، ولینا عوزریا) کو بۆ جارا ئیکێ یە شاندی ل ڤی ئاستی سەرەدانا ڤی وەلاتی دکەت.
ھەمبەر ئاستێ ھەلبژارتنێن وی وەلاتی، رێناس جانۆیی گۆت: ب شیوەکی گشتی ئەم نەشێین بێژین کو ھەلبژارتن د ئاستەکێ زۆر بەرز دابوون، ژ بەر بارێ جڤاکی و ئابووری ل وەلاتێ سودانێ، بەلێ ژ روویێ روخساری ڤە چەندین خالێن گرنگ ھەبوون ژ وان پشکداریا لایەنین سیاسی ل وی وەلاتی کو ١٦ کەسان خوە بۆ سەرۆکایەتیێ ھەلبژارتبوون ژ وان ٦ کەس سەر ب پارتین سیاسی بوون و ١٠ کەس ژی سەربەخۆبوون.
رێناس جانۆ ھێشتا ژی گۆت: ژ بۆ پەرلەمانی ٢٤ پارتین سیاسی پشکدار بووینە ژ بۆ ٣٥٠ کورسیان، ھەروەسان بۆ جڤاتا ویلایەتا ژی ٤٦ پارتیان پشکداریی کریە ل سەر جڤاتێن ١٨ ویلایەتا، ب تنی ٧ بازنێن ھەلبژارتنان پشکداری نەکریە ل ھەرێما دارفورد.
چاڤدێرێ ھەلبژارتنان ل وەلاتێ سودانێ، ئەو یەک ژی نەڤەشارت کو کوردستان بەراورد ل گەل چ وەلاتین دەڤەری ناھێتە کرن، د ڤی واری دا نە ب تنی سودان و مە وەکو ھەرێم گەلەک قوناغ دەرباز کرینە.
