فوتسالا ئافرەتێن دهۆكێ بەرهەڤییان بۆ قارەمانییا كوردستانێ دكەن
د داخویانیەكێ دا سكرتێرێ یانەیا ئافرەتێن دهۆكێ دیار كر پشتی دەستنیشانكرنا كادرێ راهێنانێ یێ تیما فوتسالێ ل سەر ئاستێ تازەپێگەهشتییان ئەڤە بۆ ماوەیێ 20 رۆژە راهێنان دهێنە كرن خوە بەرهەڤكرن بۆ قارەمانییا پیلیستانگ ئەوا دهێتە چاڤەڕێ كرن هەڤڕكیێن وێ ل دووماهییا ئەیارا بهێت هەولێرا پایتەخت مێڤاندارییا وێ بكەت.
زێدەتر سلێمان زەكی بۆ رۆژنامەیا ئەڤرۆ گۆت: پشتی هەر ئێك ژ ئاراز سالح وەكو راهێنەر، سیپەل شوكر هاریكارا راهێنەری و دەریا یونس راهێنەرا گۆلپارێزان بۆ تیما مە یا فوتسالێ هاتینە دەستنیشانكرن هەر ژ دەستپێكا ڤێ مەهێ ل دیڤ بەرنامەكێ رێكخستی راهێنانێن تیما تازەپێگەهشتییان دهێنە كرن كو حەفتیێ سێ رۆژ بۆ هاتینە دەستنیشانكرن، ئەڤ چەندە هات خوە بەرهەڤكرن بۆ قارەمانییا پیلیستانك ل سەر ئاستێ یانە و فێرگەهێن هەرێمێ كو دێ ب هەڤكارییا فیدارسیۆنا فوتبۆلا كوردستانێ ل هەولێرا پایتەخت ل دووماهییا خزیرانا بهێت هێتە ئەنجامدان.
هەروەسان ناڤهاتی گۆت: وەكو كارگێرییا یانەیا ئافرەتێن دهۆكێ هەر ژ دەست ب كاربوونا مە وەكو كارگێرییا بەروەخت مە بەرنامەیێن تەسل و ئەكادیمی بۆ یاریێن وەرزشی دانایە كو ب پشتەڤانییا پارێزگارێ دهۆكێ بشێن خزمەتا وەرزشا كچێن باژێرێ خوە بكەین و ئەم رژدین بەردەوامیێ بدەینە ئارمانجا خوە لەوما ئەم چاڤەڕێ پشتەڤانییا بەردەوام یا پارێزگارێ دهۆكێ نە ئەوێ كو بوویە ئەگەر دەرئەنجامێ ئەڤێ پشتەڤانیێ ناسناڤێ خولا فوتسالا كوردستانێ ب دەستڤە بینن كو دبیتە ناسناڤێ دویێ یێ یانەیا ئافرەتێن دهۆكێ، هەروەسان مە چەند پلان و پرۆژەیێن دی هەنە پشتی ب دووماهی هاتنا تاقیكرنێن قوتابیان ژبۆ زێدەتر خزمەتكرنا وەرزشا ئافرەتان ل پارێزگەهێ.
