فیدراسیۆنا فوتبۆلا كوردستانێ دێ ژڤانێ دووماهییا كۆپا كوردستانێ ئێكلا كەت
د داخویانیەكێ دا ئەندامێ فیدراسیۆنا فوتبۆلا كوردستانێ دیار كر بڕیارە ئەڤرۆ ژڤانێ یارییا دووماهییا كۆپا كوردستانێ بهێتە ئێكلاكرن سەرباری پێشوەخت یارییا وێ ل 28ێ ڤێ مەهێ ل یاریگەها زاخۆ یا نێڤدەولەتی هاتبوو دانان.
زێدەتر ئازاد محەمەد بۆ رۆژنامەیا ئەڤرۆ گۆت:هەرچەندە ژڤانێ یارییا دووماهییا كۆپا كوردستانێ بەری نوكە ل باژێرێ زاخۆ هاتبوو دیار كر لێ ژبەركو گۆهدار شێخۆ سەرپەرشتێ ئیدارا زاخۆ و عەمار عەلی سەرۆكێ یانەیا زاخۆ ل رۆژا 28ێ ڤێ مەهێ بەرهەڤی یاریێ نابن ژبەر گەشتا وان یا كارەكێ فەر بۆ وەلاتێ قەتەر، ئەڤچەندە ژی بوویە ئەگەر ئەم پێداچوونێ د ژڤانێ یاریێ دابكەین، ژبەركو یا گرنگ بەرهەڤبوونا هەردو بەرپرسێن ل زاخۆ دناڤ یاریگەهێ دا ژبۆ بڕێڤەبرنا رێورەسمێن ب دووماهی هاتنا كۆپا كوردستانێ و بڕیارە ئەڤرۆ فیدراسیۆنا فوتبۆلا كوردستانێ كۆمبوونا خوە بكەت پشتی كارگێرییا یانەیا زاخۆ بۆچوونا خوە بۆ مە دهنێریت ل سەر ژڤانێ یاریێ.
هەروەسان ناڤهاتی گۆت: وەكو جهـ و ماف یارییا دووماهیێ دێ ل یاریگەها زاخۆ یا نێڤدەولەتی بیت لێ وەكو ژڤان دبیت گوهۆڕین ب كەڤیتی و دبیت وەكو خوە ژی بمینت، تایبەت پشتە هەردو یانەیێن گەهشتییان یارییا دووماهیێ داخواز كرین ژڤانێ یاریێ نە هێتە گوهۆڕین كو ل دووڤ داخوازییا وان ئەگەر هاتە پاشئێخستن دێ نەچاربن مووچەكێ دی بۆ یاریزانێن خوە دابینكەن، لێ چو بڕیارێن فەرمی نینن هەتا كۆمبوون ب دووماهی دهێت.
بۆ زانین یانەیا ئاكرێ و هندرین دەربازبووینە یارییا دووماهییا كۆپا كوردستانێ، پشتی ئاكرێ ب 3-2 سەركەفتن ل سەر زاخۆ ئینایی و هندرین ب 2-1 سەركەفتن ل سەر سەیدساق ئینایی ژ چارچووڤێ قۆناغا پێش دووماهیێ
