كوردستان دێ مێڤاندارییا كۆپا عەرەبی یا كیكبۆكسینگێ كەت
ب فەرمی هەرێما كوردستانێ بۆ مێڤاندارییا قارەمانییا كۆپا عەرەبی یا یارییا كیكبۆكسینگێ هاتە هەلبژارتن پشتی پێشكەفتنا بادەكا وێ ل سەر بادەییێن وەلاتێن ئوردن، سعودیێ و جەزائیرێ، ئەوا ژلایێ فدراسیۆنا ڤێ یاریێ یا عەرەبی هاتیە دانان.
د داخویانیەكێ دا عەدنان ئەلموسەوی ئەمیندارێ گشتی یێ فدراسیۆنا یارییا كیكبۆكسینگا ئیراقی گۆت: ب فەرمی باژێرێ سلێمانیێ ل هەرێما كوردستانا ئیراقێ هاتە هەلبژارتن بۆ مێڤاندارییا قارەمانییا عەرەبی ل سەر ئاستێ هەلبژارتیێن وەلاتان و یانەیێن وەرزشی بۆ كوڕان و كچان، ئەوا بڕیارە هەڤڕكیێن وێ ل 11ێ هەتا 27ێ‌ی چریا دویێ بهێتە كرن، ئەڤ چەندە هات پشتی هەڤڕكییەكا دژوار ل گەل وەلاتێن داخوازا مێڤانداریێ كری ژ وانا تونس، ئوردن و سعوودی كو ل سەر چەند بنەمایەكا هاتبوو دانان ژ وانا ستاندەرێن جیهانی.
هەروەسان ناڤهاتی گۆت: بادەكا ئیراقێ بۆ مێڤانداریێ باژێرێ سلێمانیێ بوو كو ژبەر هەبوونا خالێن سەركەفتنا قارەمانیێ و ژێرخانەیا وەرزشی و پشتەڤانییا وەزارەتا رەوشەنبیر و لاوان ل حوكمەتا هەرێما كوردستانێ و لژنەیا ئۆلمپییا ئیراقێ، هەروەسان سەقایێ نموونە وەكر كو لژنەیا دووڤچوونێ ڕازی بیت ل سەر بادەكا ئیراقێ بۆ ڤێ قارەمانیێ، ئەڤە ژی باشترین دەلیڤەیە كو یاریزانێن مە یێن هەلبژارتیێ ئیراقێ و یانەیان مفایی ژێ وەربگرن و ناسناڤێن قارەمانیێ ب دەستڤە بینن.
ل دووماهیێ ناڤهاتی سپاسییا حوكمەتا هەرێما كوردستانێ كر و گۆت: دەستنیشانكرنا باژێرەكێ كوردستانێ بوو مە گەرەنتییا سەركەڤتنا مێڤانداریێ بوو، لەوما ژی مە باژێرێ سلێمانیێ هەلبژارت، هەرچەندە باژێرێن وەكو هەولێر و دهۆكێ ژ خالێن سەركەڤتنێ هەنە لێ پێشتر ل ئەڤان باژێران قارەمانیێن عەرەبی هاتبوونە ڕێكخستن.
