ل هەردو شۆڕەشان بامەرنێ ١١٥ شەهیدێن سەنگـەری هەنـە
سالار محەمەد دۆسكی:
1-6
پێشمەرگەیێ شۆڕشا گولانا پیشكەفتنخواز، مستەفا حسێن نەبی بامەرنی، ناسیار ب مستەفا بامەرنی، ل سالا 1957 ل بامەرنێ ژ دایك بوویە، قوناغا سەرەتایی ل بامەرنێ تەمام كریە، هێشتا ل ژیەكێ بچوویك دكەڤیتە دناڤ رێكخستنێن پارتی دیموكراتی كوردستان دا، ل دەسپێكا سالێن هەشتێیان قەستا ناڤ رێزێن پێشمەرگەی دكەت، و دبیتە پێشمەرگە ل سەرهلدانا سالا 1991 رۆلەكێ كاریگەر درزگاركرنا بارەگایێ ئەمنا بەعسیا د و پاقژكرنا باژێرێ دهۆكێ ژ حوكمەتا بەعس دگێڕیت، پشتی سەرهلدانێ ژی چەندین پلە و پوستێن ئەمنی و لەشكری وەردگریت، نوكە خانەنشین بوویە.
پێشمەرگەیێ شۆڕشا گولانا پێشكەفتنخواز، مستەفا حسێن نەبی بامەرنی، د دیدارەكێ دا ل گەل بەرپەرێ دیرۆكێ رۆژنامەیا ئەڤرۆ گۆت: مالا مە ل ناڤ شۆڕشێ بوو وی دەمی بابێ من نەدشیا پێشمەرگاتیێ بكەت، بەلێ هێشتا ل ژیەكێ بچوویك من هەست ب تەپەسەریا مللەتێ كورد كر، ل دەسپێكا شۆڕشا مەزنا ئیلۆنێ ل سالا 1961 ئەم ژ بارمەنێ ڕەڤین و چووینە ناڤ بەروارییا، دوڤدا ئەم هاتینە گوندێ هەمزا ل دەڤەرا دۆسكیا هەتا بەیانا 11ی ئادارێ، وی دەمی ژیێ من مەزنتر لێ هات و ئێدی من باشتر هەست ب كوردینێ دكر، و رەوشا سیاسی باشتر بن دەستیێ و پێشتر ژی من هەست پێ دكر، بەلێ مە ئەو شیان نەبوون بێژین دێ بینە پێشمەرگە و دا ژبیر نەكە هەر ل دەسپێكا شۆڕشا ئیلۆنێ وەك پێشتر مە ئاماژە پێكری ئەڤە دهزر و بیر وباوەرێن من دا هەبوویە، چونكە ژیانا مە هەر هەمی ڕەڤین و باركرن و گوند سۆتن بوویە.
مستەفا بامەرنی زێدەتر گۆت: بامەرنێ هەر د دەستێ پێشمەرگەی دا بوو و بیرا من دهێت ل سالێن 1962 یان 1963 ، تەقەدم هاتیە بامەرنێ و ئەم ڕەڤین چووینە ناڤ بەرواری سەرێ مەتینی و لەشكرێ ئیراقێ و چەتە پێكڤە هاتنە بامەرنێ، و بگشتی دەڤەرا بامەرنێ د دەستێ پێشمەرگەی دا بوو، بیرا من ناهێت ئەزێ بچوویك بووم بەلێ ل دوڤ ئاخفتنێن مرۆڤێن ژ مە مەزنتر دبێژن ل سالا 1961 مەلا مستەفا بارزانی هاتیە بامەرنێ و حەفت شەڤا مایە لبامەرنێ و حوكمەتێ بزاڤكرینە دانوستاندنێ ل گەل بارزانی بكەت، ل دەسپێكێ حوكمەتا ئیراقێ گوندێ (بەربانكێ) دەست نیشانكر بوو، هەر دو شاند ئێك دو بینن و دانوستاندنێ بكەن، سەركردەكێ لەشكرێ ئیراقێ بناڤێ(حەسەن عەبود) هاتبوو ڕاسپاردن ب ئەڤی كاری ڕابیت وەك لایەنێ حوكمەتا ئیراقێ، خودێ ژێ رازی مەلا مستەفا بارزانی گۆتە ئەوی سەركردێ لەشكری وەرە بامەرنێ وی سەركردەی گۆت بوویێ ژڤانێ مە ل ڤی جهی (بەربانكێ)هاتیە دەستنیشانكرن، بارزانی گۆتێ: وەرە بامەرنێ بووتە باشترە، ئەوی سەركردەیی گوهدارییا بارزانی كر و هاتە بامەرنێ و دانوستاندن ل بامەرنێ دەستپێكرن، و د دەمێ دانوستاندنا دا دو فرۆكێن حوكمەتێ هاتنە گوندێ(بەربانكێ) ئەو جهێ ل دەسپێكێ هاتیە دەستنیشانكرن تۆپبارانكر، شنی ئەوی سەركردێ لەشكریێ ئیراقێ هەستپێكر كو بارزانی شارەزایی ل گەل حوكمەتا ئیراقێ هەیە، و باش دنیاسیت و دزانی ئنیەتا حوكمەتا ئیراقێ بەرامبەر خەلكێ كوردستانێ یا باش نینە، تایبەت شۆرشا مەزنا ئیلۆنێ و مانا بارزانی ژی ل بامەرنێ ب رۆژ شەفتەكێ بوو و ب شەڤ دهاتە گوندی.
هەمان پێشمەرگەیێ شۆڕشا گولانا پێشكەفتنخواز ئەو ژی گۆت: ل هەر دو شۆڕشێن ئیلۆن و گولانێ پێشمەرگە گەلەك ل بامەرنێ بوون، و ل هەر دو شۆڕشێن ئیلۆن و گولانێ 115 شەهیدێن سەنگەری خەلكێ بامەرنێ هەنە، ژبلی شەهیدێن وەلاتی ئەوێن ب فرۆكان هاتینە كوشتن یان ل هەوا ئەنفالان هاتینە بەرزەكرن.
مستەفا بامەرنی هەروەسا گۆت: بیرا من دهێت جارەكێ لەشكرێ ئیراقێ ل گەل هێزەكا چەتان هاتنە بامەرنێ و ئەم بچوویك بووین و ئەز و برایێ خوە نەخوش بووین و (سۆرك) ل مەهاتبوون، زڤستان بوو و خەلكێ گوندی گەلەك ڕەڤی بوون چووبوونە پشتا گوندی، چەتە هاتنە مالا مە و بیرا من دهێت گۆتە بابێ من دڤێت خێزانا خوە ژ خانی دەربێخی ئەم دێ دەست ب سۆتنا خانی كەین، ل گەل ڤێ چەندێ هندەك ژ خەلكێ بامەرنێ چەتە بوون و ل گەل رێكانیا بوون و بابێ من نیاسی و بەرەڤانی ژ مەكر و نەهێلان ئەو كار بهێتەكرن، و ژیێ من دناڤبەرا چار بۆ پێنچ سالیێ دا بوویە، گوندێ بامەرنێ بگشتی دناڤبەرا چار بۆ پێنچ جاران هاتیە سۆتن و كاڤلكرن، و هەتا نوكە جهێن خانیێن مە ماینە و حوكمەتا بەعس خرابكرن و ڕاستكرن و بەرێن خانیان بۆ پرۆژێن خوە ل گارەی و ئاشەوا ڤەگوهاستینە.
مستەفا بامەرنی، بەحسێ روژانێن رێككەفتنا 11ی ئادارێ یا سالا 1970ێ، د ناڤبەرا سەركردایەتیا شۆڕشا ئیلۆنێ و حوكمەتا بەعس دا كر و گۆت: وی دەمی مالا مە ل گوندێ (هەمزا) بوو ل دەڤەرا دۆسكیا و دەنگۆباسێ رێككەفتنێ و ئاشتیێ مە ب رێكا رادیۆیا زانی، و ئەم هندەك مالێن (مەجلمەختی) یا پێكڤە ل وی گوندی بووین، و دەمێ رێككەفتن هاتیە ڕاگەهاندن و دەوات و ئاهەنگ هاتنەكرن، وی دەمی گەنج بووم و گەلەك دەوات مە ل (هەمزا) كر و بێی رێكخستن ئاهەنگ هاتنەكرن، و خەلكێ گوندی ب ئەڤێ چەندێ رابوون و دەواتكرن، پشتی رێككەفتنێ ئەم دووبارە هاتینە بامەرنێ و مە دەست ب ئاڤاكرنا خانیان كر، و ئەم ماین هەتا هەوا ئەنفالا ل سالا 1988ێ، بەلێ ژبیر نەكەم ل سالا 1975 ئەم هەر ل بامەرنێ بووین و ئەم ماوەكی چووینە گوندێ(هەمزا) بەلێ ئەم هەر زڤرینە بامەرنێ ڤە، وی دەمی ئەم ماینە ل بامەرنێ و حوكمەت هات وی دەمی ئەز رێكخستی بووم بەلێ نە ب بوومە پێشمەرگە، ل سالا 1974 ئەم قوتابی بووین و ب رێكا رێكخستنێن قوتابیان ئەم چووینە ناڤ رێزێن پارتی دیموكراتی كوردستان و شانەكا رێكخستنێ یا سەر ب رێكخراوا بامەرنێ ڤەبووین.