نێچیرڤان شوكری: كوڕێن پیرسێ نموونە ئاست نیشان دا و گەشبینی پەیداكریە
شاهۆ فەرید:
تیما تەپاپێی یا یانەیا پیرس د ئێكەم یاریا خوە ژ چارچووڤەیێ ڤاڤارتنێن خۆلا پلە دو یا ئێراقێ ب وەكهەڤی دگەل خاك ئەنجامدا و یارییا بهێت دگەل رەبیعە دووماهی دەلیڤەیە بۆ دەربازبوونا قۆناغا دویێ.
ل دور ڤێ یەكێ نێچیرڤان شوكری راهێنەری تیما پیرس بۆ رۆژناما ئەڤرۆ گۆت: ژ ئاستێ تیما خوە كوڕێن پیرس رازینە چونكۆ یاریەكا نموونە ئەنجامدان و گەشبینی پەیداكرییە، من باوەرنەدكر دێ شێن ئەڤی ئاستی نیشاندەین تایبەتی نیڤا دویێ، یاریزانان یاریەكا هەڤچەرخ كر و شیان گولەكێ توماربكەین و گەلەك دەلیڤە ژ دەستدان، هەر زوی دێ بەرهەڤییان بۆ یاریا بهێت بەرامبەری یانەیا رەبیعە كەین كو دێ ل مووسل هێتە ئەنجامدان دێ ئەڤێ یاریێ جەنگین بۆ سێ خالان و دەربازبینە قۆناغا دویی.
ژلایەكێ دیڤە بەهزاد سالح سەروكێ یانێ گۆت: تیما مە ئاستەكێ هەرێ باش نیشاندا و دەسپێكا یاریێ وەكۆ ترسەكێ دەف یاریزانێن مە پەیدابوو لێ دنیڤا دویێ دا نموونەبوون، ئەگەر ترسێ ژی ئێكەم جارە ئەو یاریزان بڤی ئاستێ بلند یاریێ دكەن، شوین تبلێن دەستەكا راهێنەران دیاربوون، ئەو پلانا مە داناتی شیان سەری بگریت و لدووڤ پێشبینیا من مە گۆلا وەكهەڤیێ ئینا، پتر دێ گرنگیێ دەینە یاریا بهێت ژ ئەڤا چووی دگەل رەبیعە دێ بزاڤێن سەركەفتن كەین، هندەك یاریزانێن مەژی ئەڤێن سەربور هەین یاری دگەل تیما دهۆك هەبوون، ڤەگەریانا وان یاریا بهێت دێ ئاست باشتربیت.
