پێشانگەهەکا شێوەکاری یا تایبەت ل دهۆکێ ڤەکر
زنار تۆڤی
رێڤەبەرییا گشتی یا رەوشەنبیری هونەری ل دهۆکێ، رێڤەبەرییا هونەرێ شێوەکاری، پێشانگەهەکا تایبەت یا 11 ێ، بۆ هونەرمەندێ شێوەکار ئەنوەر مستەفا بەرواری ل هولا گەلەریا دهۆکێ ڤەکر.
ناڤهاتی بۆ رۆژناما ئەڤرۆ دیارکر: ئەز ب شێوازی ئەبستراکت، سیمبۆلات و ئازاد کاردکەم، ب 36 کەڤالان من پشکداری د ڤێ پێشانگەهەکا تایبەت دا کرییە، هەروەسا ل قووناغا ناڤنجی ل بەغدا، من دەست ب کارێ شێوەکاری کرییە، حافز درۆبی، شێوەکارەکێ ناڤدارێ عێراقی بوویە، ئەز ژ وی فێربوویمە کارێ شێوەکاریێ د ماوێ سێ سالان دا، ل گەل هندێ ل سالا 1985 من پێشانگەهەکا خۆ یا ئێکێ یا شێوەکاری یا تایبەت ڤەکرییە، هەتا نوکە من 11 پێشانگەهێن شێوەکاری یێن تایبەت ڤەکرینە، ئەڤە 10 سالە ئەز کار ل سەر چێکرنا ڤێ پێشانگەهێ دکەم، ئەز داخبارم ب قوتابخانا فرەنسی یا شێوەکاری.
ئەو ژی گۆت: ناڤەرۆکا هەر 36 کەڤالێن من هەموو ل سەر شێوازێ ئەبستراکت و سیمبۆلاتن، ئەز حەز ژ کار و هزرێن جودا د وارێ شێوەکاری دا دکەم، من حەزا هەیی وێنەیی دروست بکەم، بێی کو هزر تێدا بکەم، ئەڤە 65 سالە ئەز کارێ شێوەکاریێ دکەم و ئێک ژ شێوەکارێن ناڤدارم ل عێراقێ، هەروەسا ئەو کەڤالێن من چێکرین، من هندەک فرۆتینە، هندەک ژی ب دیاری من داینە خەلکێ.
ئەنوەری گۆت ژی: ل سالا 1973 من رۆمانا خۆ یا ئێکێ ب ناڤێ بێریڤان نڤیسیە، هەتانوکە من 14 رۆمان و چیرۆک ژی نڤیسینە، ئەڤە 20 سالە ئامیرێ عودێ دژەنم، من گەلەک حەز ل سەر ڤی ئامیرێ موزیکێ هەیە، دیسا ئامیرێ کەمانێ ژی دژەنم.
ئەنوەر مستەفا بەرواری، دەرچوویێ کۆلیژا زانستی یە، پشکا جیۆلۆجی زانگۆیا بەغدا، ل سالا 1946 گوندێ چەمسەیدا، ل دەڤەرا بەرواری بالا ژ دایک بوویە.
