پێنج یانەیێن پارێزگەهێ دێ شەڕی بۆ پلا ئێكا كوردستانێ كەن
چاڤەڕێ دهێتە كرن ئەڤرۆ و سوبەهی دەست ب هەڤڕكیێن قۆناغا دویێ یا خولا پلا دو یا كوردستانێ بۆ یارییا تەپا پێی دەربازبوون بەر ب خولا پلا ئێك، ئەوا 20 یانەیێن هەرێمێ پشكدارن و هاتینە بەلاڤكرن ل سەر دو كۆما، پێنج یانەیێن پارێزگەها دهۆكێ دێ شەڕی بۆ پلێتا دەربازبوونێ كەن ئەوا دێ یاریێن وێ ب شێوەیی ئێك قۆناغ هێنە كرن.
د كۆما ئێكێ دا ئەوا دو یانەیێن پارێزگەهێ پشكدار، تیما یانەیا شێخان ل سەر ئەردێ یاریگەها خوە دێ مێڤاندارییا یانەیا باوەنوور كەت، ژلایێ خوەڤە یانەیا باتیفا ژی د ناڤ ئەرد و جەماوەرێ خوە دا دێ یانەیا كفری مێڤان كەتن، ژ یاریێن دی یێن ڤێ كۆمێ، سەنكەسەر- ئاسۆ، خەبات- هەریر، خلاتی پێنجوین- پەروەردە.
د كۆما دویێ دا ب پشكدارییا سێ یانەیێن پارێزگەهێ یاریێن وان بڤی شێوەیی هێنە كرن، شێلادز دێ ل یاریگەها خوە مێڤاندارییا یانەیا بەردەڕش كەت د یارییەكا ئاگرین یا دێربییا پارێزگەهێ دا، ژلایێ خوەڤە گارە ژی دناڤ ئەرد و جەماوەرێ خوە دا دێ مێڤاندارییا بەختیاری كەت، ژ یاریێن دی، سنوور- خەلیفان، شارەزوور- مەخمۆر، حاجیاوا- سیرۆانی شارەزوور.