گەزیزە عومەر: د پتریا مالان دا تەماشەی درامایێن بیانی دهێتە كرن
سولین سلێمان:
هونەرمەندا ناڤدار (گەزیزە عومەر) كو ئەڤە بۆ دەمێ پتر ژ چل سالانە وەك ئەكتەر خزمەتا شانۆ و دراما كوردی دكەت، د دیدارەكێ دا بۆ رۆژناما ئەڤرۆ گۆت: ئەز ب رێیا بابێ خوە هاتیمە دناڤ بۆارێ هونەری دا و وەك ئەكتەر من پشكداری د هژمارەكا زۆرا فلم و دراما و شانۆگەریان دا كریە و هیڤیا من ئەوە ل دووف شیانێن خوە ئەز شیابم خزمەتەكا بچووك پێشكێشی هونەرێ كوردی بكەم.
گەزیزا كو هەڤژینا هونەرمەندێ وەغەركری (ئیسماعیل خەیات) ە، هێشتا گۆت: ب مخابنی ڤە ئەو ئاستێ نوكە ئەز د درامایێن كوردی دا دبینم، نە ئەو ئاستە یێ مە پێشبینی بۆ كری، چنكو د پتریا مالان دا تەماشەی درامایێن بیانی دهێتە كرن و یێن كوردی گەلەك ب كێمی دهێنە دیتن، بۆ زانین من درامایەك نڤیسیە و دخوازم ئەز ب خوە كارێ دەرهێنانا وێ راببم، ئەو ژی هەتا دەلیڤە دهێت و ئەز د درامایا (گەردەلۆل) دا ئەز ب رۆلێ كچەكێ رابووم ب ناڤێ (جوان) و گەلەك بەرنیاس بووم وهەتا نوكە ژی ل هندەك كەنالان ئەو دراما دهێتە نیشادان و دهێتە هژمارتن ئێك ژ درامایێن پر بینەرترین دراما ل سەر ئاستێ هەرێما كوردستانێ.