گەڕا چارێ یا فەستیڤالا فلمێن كوردی ل رووسیا دێ هێتە گێڕان
زنار تۆڤی:
گولیزەر گەردەن زەری، د دیدارەكێ دا بۆ رۆژناما ئەڤرۆ دیاركر كو گەڕا چارێ یا فەستیڤالا فلمێن كوردی ل وەلاتێ رووسیا ل رۆژێن 18_22 ی ئیلۆنا 2024 ێ، ل باژێرێ مۆسكۆ ل وەلاتێ رووسیا دێ هێتە گێڕان و فیستەڤال دێ ب سەرۆكاتیا هونەرمەند كەرەم گەردەن زەری بیت، كو خۆجهێ وەلاتێ رووسیایە.
ناڤهاتیێ گۆت: دوێ فەستیڤالێ دا چەندین فلمێن كوردی دێ هێنە نیشادان، هەروەسا پشكا بەلگە فلمان و كورتە فلمان و شەڤا سینەما كوردی و نیشادا باشترین فلمێن رووسی، پێشانگەها كلتۆری و هونەری دێ ل مۆسكۆیا پایتەختێ رووسیا هێتە گێران، رۆژا 10 خزیرانا ئەڤ سالە دووماهی مولەتە بۆ هنارتنا بەرهەمێن سینەمایی، هەروەسا خەلاتێ هەتاڤا زێری، كو ئەڤ خەلاتە د پێنج پشكان دا دهێتەدان، ژ وان ژی باشترین فلم و باشترین بەلگە فلم و باشترین كورتە فلمێ چیرۆكی و باشترین بەلگە فلمێ كورت و خەلاتێ هەڤپشكێ سینەما كوردی، بۆ زانین ل فیستەڤالا سالا بۆری ل مۆسكۆ، گرنگی ددا سینەما رۆژهەلاتێ كوردستانێ و مێژوو و دابونەریتێن دەولەمەندێن وێ و ئەڤ سالە دێ گرنگییێ دەتە ئاخفتن و دانوستاندنێن دناڤبەرا كلتۆر و هاریكاریا ل گەل سینەما رووسیا و ل سالا بۆری ئەم شیاین پێشانگەهەكا هونەرێ هەڤچەرخێ كوردی برێڤە ببەین و ژبلی سینەما و شێوەكارییێ، مۆزیك و دەوات و ئەدەبیات و خوارنێن كوردی ژی بۆ مێهڤانان هاتنە پێشكێشكرن.