سەرکردەکێ ئێکگرتوو: سەرکرداتیا ئێکگرتوو داخوازێن بادینان قەبوول کرن
ئەڤرۆ نيوز، ڤەگێر سەعدوللا:
ئەندامەکێ سەرکرداتیا ئێکگرتوو یا ئیسلامی و ئێک ژ دامەزرێنەرێن وێ دیار کر کو کۆمبوونا سەرکرداتیا وان ل دۆر داخوازێن بادینان یا ئەرێنی بوو و بۆ رۆژناما ئەڤرۆ گۆت: “سەرکرداتیێ داخوازێن مە قەبوول کرن”.
دیندار نەجمان دۆسکی ئاشکرا ژی کر کو لژنەک بۆ چاوانیا دابەشکرنا پۆستان ھاتە پێکئینان و قەبارێ حزبی ل ھەر دەڤەرەکێ دێ ل بەرچاڤ ھێتە وەرگرتن و ئێدی پۆستێن حزبی د ناڤ ئێگکرتوو دا دێ ل سەر بنەمایێ رێژا حزبی ل ھەر پارێزگەھەکێ ھێنە دابەشکرن و پۆستێن حکومی ژی دێ ل دووڤ ئستیحقاقێ ھەلبژارتنان یێ وێ دەڤەرێ ھێنە دابەشکرن و گۆت: “بڕیار ھاتە دان دەڤەرا بادینان د پۆستان دا بھێتە قەرەبوو کرن و پۆستێن مایی ل حوکمەتا ھەرێمێ و عیراقێ دێ بۆ دەڤەرا بادینان بن”.
دۆسکی خویا کر کو کێشێن ھزری دێ د کۆنگرێ حزبا وان دا ھێنە چارە کرن.