رۆژنامه‌كا ئه‌مريكى نهێنيا به‌رزه يا ئه‌گه‌رێ خوه‌نيشادانێن ئيرانێ ئاشكرا دكه‌ت
ئه‌ڤرۆنيوز:
رۆژناما نيويۆرك تايمز يا ئه‌مريكى، دياركر كو ئه‌گه‌رێ خوه‌پيشادانێن ئيرانێ ئاشكرابوونا بودجا پێشبينى كريه ژلايێ حوكمه‌تا ئيرانێ ڤه بۆ ده‌زگه‌هێن ئايينى ل وى وه‌لاتى كو ب ملياران دۆلارانه.
رۆژناما ناڤبرى دراپۆرته‌كا خوه دا دبێژيت” بۆ وه‌لاتيێن ئيرانى ئاشكرابوو كو ب ملياران دۆلار ژ بودجا وه‌لاتى بۆ ده‌زگه‌هێن ب سه‌ر زه‌لامێن ئايينێ شيعه يێن توندره‌و وله‌شكرى وپاسداران دچن كو ئه‌و پارێ زه‌به‌لاح دبيته ئه‌گه‌رێ زه‌نگينبوونا ته‌خا حوكمران”.
به‌لاڤكر ژى” وه‌لاتيێن ئيرانى گه‌هشتنه وێ باوه‌ريێ كو بودجا پێشبينى كرى پشته‌ڤانيا دارايى ژمليۆنان وه‌لاتيان دبريت كو ئه‌ڤ چه‌نده يا هه‌ڤده‌مه ل گه‌ل كرانبوونا بهايێن سوته‌مه‌نيێ وڤه‌گۆهاستنا قوتابخانێن حوكمه‌تێ بۆ كه‌رتێ تايبه‌ت”.
دياركر ژى” دياره ئاشكراكرنا وان نهێنيان مه‌ره‌م ژێ بلندبوونا نه‌رازيبوونا وه‌لاتيان بوو كو ئه‌و چه‌نده روودا تۆرا جڤاكى يا تيليجرامى ئه‌وا 40 مليۆن ئيرانى بكاردئينن، تژى بووى ژ نه‌رازيبوونان”.
رۆژناما ئه‌مريكى ئاماژه دا كو” هێزێن له‌شكرێ ئيرانى كو ل هه‌بوون ل چه‌ندين وه‌لاتێن رۆژهه‌لاتا ناڤين يا هه‌ى، بۆدجا وا هاته زێده‌كرن بۆ 11 مليار دۆلاران كو ئه‌و بودجه‌يه ب رێژه‌يا 20% زێده‌بوويه، هه‌روه‌سا بودجا تايبه‌ت ب نوونه‌رێن رێبه‌رێ بلند يێ ئيرانى عه‌لى خامه‌نه‌ئى ژى ل زانكۆيان هاتيه زێده‌كرن، زێده‌بارى زێده‌كرنا بودجا په‌يمانگه‌هێن ژلايێ زه‌لامه‌كێ ئايينى يێ توندره‌و ڤه دهێنه ب رێڤه‌برن”.
رۆژناما نيويۆرك تايمز ژزارده‌ڤێ وه‌لاتيه‌كێ باژێرێ ته‌هرانێ ڤه‌دگۆهێزيت” گه‌له‌ك پێخوه‌ش حالبووم ب خوه‌نيشادانان ودخوازم ئه‌ڤ ته‌خا زه‌لامێن ئايينى ل سه‌ر ده‌ستهه‌لاتێ نه‌مينيت، ژبه‌ركو وان ژيانا مه يا ژنابرى”.
دياركر ژى” ته‌خا حوكمران ل ئيرانێ به‌رپرسا سه‌ره‌كى يه ژ گه‌نده‌ليێ ونه‌بوونا يه‌كسانيێ وكێمبوونا مووچان وبۆمن گرنك نينه ئيران وه‌كو سووريێ يان عيراقێ لێ بهێت، به‌لكو بۆ من گرنگه ئه‌ڤ ته‌خا حوكمران ل سه‌ر ده‌ستهه‌لاتێ نه‌مينيت”.
ل دووڤ وێ رۆژنامێ” ل وى دمێ ئيرانێ ب ملياران دۆلار ل به‌رفره‌هبوونا ده‌ستهه‌لاتا خوه ل سووريێ و عيراقێ دمه‌زاخت، رێژا بێكاريێ دناڤ گه‌نجێن ئيرانێ دا گه‌هشتبوو 40%”.
