ل دۆر هژمارا فه‌رمانبه‌رێن شه‌مه‌نده‌فه‌ران ل هه‌رێمێ رۆهنكرنه‌ك هاته ده‌ركرن
ئه‌ڤرۆنيوز:
ل سه‌ر وان ده‌نگوباسێن هاتينه به‌لاڤكرن كو ل هه‌رێما كوردستانێ ب هزاران كه‌س كارمه‌ندێن هێلا شه‌مه‌نده‌فه‌رانه وڤێ چه‌ندێ ل تۆرێن جڤاكى ده‌نگ ڤه‌داى، وه‌زاره‌تا ڤه‌گۆهاستنێ وگه‌هاندنێ ل هه‌رێمێ ده‌نگوباسێن هه‌بوونا 32 هزار كارمه‌ندێن هێلا ئاسنى ره‌ت دكه‌ت ودبێژيت” چو راستى دوى ده‌نگوباسى دا نينه”.
درۆهنكرنا وه‌زاره‌تا ڤه‌گۆهاستن وگه‌هاندنێ دا كو ل سه‌ر زارێ په‌يڤدارێ وێ (ئۆمێد محه‌مه‌د سالح) هاتيه به‌لاڤكرن، هاتيه” ده‌مێ چه‌ند رۆژانه دتۆرێن جڤاكى دا ده‌نگوباسه‌كێ بێ بنه‌ما ل دۆر هژمارا فه‌رمانبه‌ر وكارمه‌ندێن (هێلا شه‌مه‌نده‌فه‌رێ) ل هه‌رێما كوردستانێ هاتيه به‌لاڤكرن، بۆ به‌رچاڤكرنا پێزانينێن دروست وهوور بۆ وێ چه‌ندێ بۆ هه‌موو لايه‌كى رۆهن بيت، رادگه‌هينين:
- ل هه‌رێما كوردستانێ ول وه‌زاره‌تا ڤه‌گۆهاستنێ وگه‌هاندنێ، چو رێڤه‌به‌رى وپشك نينن ب ناڤێ هێلا شه‌مه‌نده‌فه‌رێ، ئه‌وا هه‌ى رێڤه‌به‌ريا گشتى يا ڤه‌گۆهاستنا زه‌مينى وهێلا ئاسنى وتراموايه وسه‌رجه‌مێ ميلاكێ وان ل هه‌موو پارێزگه‌هان وئيدارێن سه‌ربخوه 748 كارمه‌ندن.
- به‌رچاڤكرنا وێ هژمارا مه‌زن يا فه‌رمانبه‌ران يا دووره ژ راستىێ ورێژا ميلاكێ وه‌زاره‌تا ڤه‌گۆهاستنێ وگه‌هاندنێ ب ديوانا وه‌زاره‌تێ وهه‌موو رێڤه‌به‌ريێن گشتى ب هه‌ردو فرۆكخانێن نێڤده‌وله‌تى يێن هه‌ولێرێ وسلێمانيێ تنێ 5481 فه‌رمانبه‌رن ب فه‌رمانبه‌رێن هه‌ميشه‌يى وگرێبه‌ست ڤه وئه‌ڤ هژماره دداتان دا ژى دتۆماركرى نه.
