رۆهنكرنه‌ك ل دۆر مووچێ شه‌هيدان دهێته دان
ئه‌ڤرۆنيوز:
وه‌زيرێ كاروبارێن شه‌هيدان وئه‌نفالكريان ل هه‌رێما كوردستانێ دكۆنگره‌كێ رۆژنامه‌ڤانيدا ئه‌ڤرۆ ئێكشه‌مبى 28/1/2018 ل هه‌له‌بجه راگه‌هاند، ئه‌و چه‌ندا دهيته گۆتن ل دۆر هنارتنا ليستا مووچێ شه‌هيدان بۆ به‌غدا شاشيه‌ك بوو.
مه‌حموود حاجى سالح وه‌زيرێ كاروبارێن شه‌هيدان وئه‌نفالكريان گۆت” ئه‌م يێن ددانوستاندنێ دا ل گه‌ل به‌غدا كو ل دووڤ مادێ 132 ژدستوورێ عيراقێ كو حوكمه‌تا عيراقێ پێگير كريه كو هه‌موو زيانين خه‌لكێ كوردستانێ ژجينوسايدێ وكاڤلكرنێ ئه‌وێن ب سه‌رى هاتين بچيته دبن بارێ بجهئينانێ دا، زيان ژلايه‌كى ومينجا كه‌سوكارێن شه‌هيدان وزيندانيێن سياسى ژپارێ سيداى بهێته دان، نه‌كو ژ وى پارێ بۆ هه‌رێما كوردستانێ هاتيه ته‌رخانكرن ومه نڤيسار يا چێكرى بۆ وێ چه‌ندێ بكه‌ڤينه ددانوستاندنێ دا وهه‌تا نوكه مه ليست نه هنارتينه”.
دوهى شه‌مبيێ 27/1/2018، فوئاد عوسمان په‌يڤدارێ وه‌زاره‌تا كاروبارێن شه‌هيدان وئه‌نفالكريان ل هه‌رێما كوردستانێ راگه‌هاندبوو” وه‌زيرێ كاروبارێن شه‌هيدان وئه‌نفالكريان ل گه‌ل كۆمه‌لا زيندانيێن سياسى كۆمبوويه وبۆ وان دياركر كو ب رێيا جڤاتا وه‌زيرێن هه‌رێمێ داخوازه‌ك پێشكێشى جڤاتا وه‌زيرێن عيراقێ وجڤاتا نوونه‌ران كريه بۆ وێ چه‌ندێ مادێ 132 ژ دستوورێ عيراقێ وقانوونا هژمار 4 يا جڤاتا نوونه‌ران بهێنه بجهئينان”.
فوئادى گۆتبوو” بجهئينانا وێ قانوونێ دێ مووچه وئيمتيازاتێن زيندانيێن سياسى وكه‌سوكارێن شه‌هيدان وه‌كو به‌غدا لێ هێن وليستا مووچێن زيندانيێن سياسى يا هاتيه هنارتن بۆ به‌غدا ونوكه ژى ليستا مووچێن كه‌سوكارێن شه‌هيدان يا دهێته به‌هه‌ڤكرن كو ئه‌وژى بهێته هنارتن بۆ به‌غدا ومووچه وئيمتيازاتێن زيندانيێن سياسى وكه‌سوكارێن شه‌هيدان وه‌كو يێن به‌غدا لێ بهێن”.
