دڤێ حه‌فتيێ دا مووچێ ڤان دو وه‌زاره‌تان دێ هێته به‌لاڤكرن
ئه‌ڤرۆنيوز:
ژێده‌ره‌كى ژ وه‌زاره‌تا دارايى وئابوورى بۆ ئه‌ڤرۆ نيوز دياركر” ل دووڤ سيسته‌مێ به‌لاڤكرنا مووچه‌ى هه‌ر 30 رۆژان، برياره ل رۆژا 2/5/2018 مووچێ وه‌زاره‌تێن په‌روه‌ردێ وساخله‌ميێ بهێنه به‌لاڤكرن”.
وى ژێده‌رى دياركر ژى” ژێده‌رێ مووچێن فه‌رمانبه‌رێن هه‌رێمێ ئه‌و 317 مليار دينارێن حوكمه‌تا به‌غدا بۆ هه‌رێمێ ڤرێ دكه‌ت وئه‌و پارێ وه‌زاره‌تا سامانێن سروشتى ژى دده‌ته وه‌زاره‌تا دارايى، به‌لاڤكرنا مووچێن هه‌موو وه‌زاره‌تان ژى دێ گرێداى ده‌مێ وێ پارێ سامانێن سروشتى بيت ئه‌وێ بۆ وه‌زاره‌تا دارايى دابين دكه‌ت، هه‌كه زوو بگه‌هيت دبيت به‌رى هه‌لبژارتنان مووچێ هه‌موو وه‌زاره‌تان بهێته به‌لاڤكرن، ئه‌گه‌ر نه، دێ به‌لاڤكرنا مووچێ هنده‌ك وه‌زاره‌تان چيته پشتى هه‌لبژارتنێن جڤاتا نوونه‌رێن عيراقێ”.
ژئاليه‌كى دىڤه، سه‌رۆكێ ئێكه‌تيا فه‌رمانبه‌رێن كوردستانێ راگه‌هاند، ل ڤێ هه‌فتيێ ده‌ست ب به‌لاڤكرنا مووچێ هه‌يڤا شوباتێ دێ هێته كرن.
يوسف عوسمان، سه‌رۆكێ ئێكه‌تيا فه‌رمانبه‌رێن كوردستانێ دداخۆيانيه‌كا رۆژنامه‌ڤانى دا گۆت” ل دووڤ وان پێزانينێن گه‌هشتينه مه ژ وه‌زاره‌تا دارايى يا هه‌رێما كورستانێ، ل ڤێ هه‌فتيێ دێ ده‌ست ب به‌لاڤكرنا مووچێ هه‌يڤا شوباتێ هێته كرن”.
گۆت ژى” ل ده‌ستپێكا ڤێ هه‌فتيێ دێ ده‌ست ب به‌لاڤكرنا مووچه‌ى هێته كرن ول ده‌ستپێكێ دێ مووچێ هه‌ردو وه‌زاره‌تێن په‌روه‌ردێ وساخله‌ميێ هێته به‌لاڤكرن وبرياره ژى هه‌ر دڤێ هه‌فتيێ دا مووچێ وه‌زاره‌تا دارايى ژى بهێته به‌لاڤكرن”.
دياركر ژى” دهێته چاڤه‌رێكرن به‌لاڤكرنا مووچێ پشكه‌ك ژ وه‌زاره‌ت وفه‌رمانگه‌هان يێ مه‌ها شوباتێ بكه‌ڤيته پشتى هه‌لبژارتنێن جڤاتا نوونه‌رێن عيراقێ كو برياره ل 12/5 بهێنه ئه‌نجامدان”.
