شه‌ش حزبێن نه‌رازى ئه‌ڤ برياره ده‌ركرن
ئه‌ڤرۆنيوز:
سه‌ركردێن شه‌ش حزبێن نه‌رازى ژئه‌نجامێن هه‌لبژارتنان دكۆنگره‌كێ رۆژنامه‌ڤانى دا داخوازا دووباره ئه‌نجامدانا هه‌لبژارتنان دكه‌ن.
ئه‌ڤرۆ دوشه‌مبى 14/5/2018، هه‌ر ئێك ژ عومه‌رێ سه‌يد عه‌لى رێكخه‌رێ بزاڤا گۆران وعه‌لى باپير ئه‌ميرێ كۆمه‌لا ئيسلامى وسه‌لاحه‌دين به‌هائه‌دين ئه‌ميندارێ گشتيێ ئێكگرتوو ئيسلامى وبه‌رهه‌م سالح سه‌رۆكێ ليستا هه‌ڤپه‌يمانيا ديموكراسى ودادپه‌روه‌ريێ وكاوه مه‌حموود سكرتێرێ حزبا شيوعى وعرفان عه‌بدولعه‌زيز رابه‌رێ بزاڤا ئيسلامى ل هه‌ولێرێ كۆمبوون.
سه‌لاحه‌دين به‌هائه‌دين، ئه‌ميندارێ گشتيێ ئێكگرتوو ئيسلامى دكۆنگره‌كێ رۆژنامه‌ڤانى دا راگه‌هاند كو ئارمانجا راسته‌قينه يا مه ڤه‌گه‌راندنا ده‌نگێ ده‌نگده‌رانه، هه‌روه‌سا وان شه‌ش بريارا پێكئينانا لژنه‌كا هه‌ڤپشك بۆ ڤه‌گه‌راندنا ده‌نگێن هاتينه دزين دايه وده‌رگه‌ه ژى هێلايه ڤه‌كرى بۆ هه‌ر لايه‌نه‌كێ سياسى هه‌كه بچيته دناڤ وى به‌ره‌ى دا.
ئه‌و خالێن وان هه‌ر شه‌ش حزبان دكۆمبوونا ئه‌ڤرۆ دا بريار ل سه‌ر داى، ئه‌ڤه‌نه:
- ره‌تكرنا ئه‌نجامێن به‌راهيێ وهه‌موو پرۆسا هه‌لبژارتنان.
- داخوازا دووباره‌كرنا هه‌لبژارتنان ل هه‌رێما كوردستانێ وكه‌ركووكێ وده‌ڤه‌رێن دابراى.
- ئارمانجا راسته‌قينه يا لايه‌نێن پشكدار دكۆمبوونێ دا، به‌رگريه ژ ده‌نگێ راسته‌قينه‌يێ خه‌لكى.
- بۆ وێ مه‌ره‌ما ل سه‌رى، هه‌موو رێكارێن سياسى، قانوونى ومه‌ده‌نى دێ بكارئينين بێ توندوتيژى.
- پێكئينانا لژنه‌كا هه‌ڤپشك ژ ڤان شه‌ش لايه‌نان بۆ ڤه‌گه‌راندنا ده‌نگێن هاتينه دزين وده‌رگه‌ه ژى يێ ڤه‌كريه بۆ هه‌ر لايه‌نه‌كێ دى بهێته دناڤ وێ لژنێ دا.
- داخوازێ ژ كۆمسيۆنا هه‌لبژارتنێن عيراقێ دكه‌ين ب له‌ز ل دووڤ ڤان داخوازيان بهێت.
