د جه‌ژنێ دا كه‌سه‌كى گيانێ خوه ژ ده‌ست دايه و كچه‌كێ ژى بزاڤا خوه كوشتنێ كريه
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا ساخله‌ميا پارێزگه‌ها دهۆكێ ئامارا رۆژانێن جه‌ژنێ يا روودانان ل گه‌ل ئامارێن خوه‌پاراستنێ يێن رۆژانێن ره‌مه‌زانێ راگه‌هاند كو تێدا كه‌سه‌كى گيانێ خوه ژ ده‌ست دايه و حه‌فت دكان ژى هاتينه داخستن.
حه‌مزه ره‌زيكى، به‌رپرسێ راگه‌هاندنێ ل رێڤه‌به‌ريا گشتى يا ساخله‌ميا پارێزگه‌ها دهۆكێ، د كۆنگره‌كێ رۆژنامه‌ڤانى دا راگه‌هاند كو ل رۆژانێن جه‌ژنێ 12 هزار و 184 كه‌سان سه‌ره‌دانا نه‌خۆشخانان كريه و 83 نشته‌رگه‌رى هاتينه ئه‌نجام دان.
خويا ژى كر كو ل رۆژانێن جه‌ژنێ 273 زارۆ هاتينه سه‌ر دونيايێ و ژوان ژى 152 كوڕ و 121 كچ بووينه.
ده‌رباره‌ى روودانێن هاتنوچوونێ ژى دا زانين كو د ماوێ رۆژانێن جه‌ژنێ دا، 21 روودان په‌يدا بووينه و 13 ژى لێكدان بووينه، د ئه‌نجام دا، كه‌سه‌كى گيانێ خوه ژ ده‌ست دايه و هه‌شت كه‌س ژى بريندار بووينه.
حه‌مزه ره‌زيكى ئاماژه ب وێ چه‌ندێ ژى كر كو چه‌ندين حاله‌تێن ب شه‌رچوونێ ژى هاتينه تۆماركرن و 18 حاله‌تێن برينداربوون ب چه‌قۆيان بۆ نه‌خۆشخانان هاتينه ره‌وانه‌كرن و گۆت: “14 كه‌س ژى ژ بلنداهايان كه‌فتينه خوار”.
ل دۆر تيمێن ڤه‌گوهاستنا ده‌سپێكى 122 ژى دايه زانين كو 31 حاله‌ت گه‌هاندينه نه‌خۆشخانان كو ژ وان كچه‌ك بوويه ل ئێك ژ كه‌مپێن ئاواران و بزاڤا خوه‌كوشتنێ كريه، به‌لێ تيمێن وان يا پێدڤى بۆ كريه و ژ مرنێ رزگاركريه.
ده‌رباره‌ى حاله‌تێن سۆتنێ ژى، به‌رپرسێ راگه‌هاندنا رێڤه‌به‌ريا گشتى يا ساخله‌ميا پارێزگه‌ها دهۆكێ گۆت: “ل رۆژانێ جه‌ژنێ 45 حاله‌تێين سۆتنێ ژى هاتينه تۆماركرن، ره‌وشا هه‌موويان ژى يا باشه”.
حه‌مزه ره‌زيكى د پشكه‌كا دى يا كۆنفرانسێ خوه يێ رۆژنامه‌ڤانى دا ئاماژه دا ئامارێن رێڤه‌به‌ريا خوه‌پاراستنا ساخله‌ميا پارێزگه‌ها دهۆكێ و گۆت: “د رۆژانێن ره‌مه‌زانێ دا، حه‌فت جهـ هاتبوونه دايخستن و 81 جهـ ژى هاتبوونه غه‌رامه‌كرن و هوشدارى ژى دابوو 267 جهان”.
