پێشمه‌رگێن هێزا پاراستنا ژينگه‌هێ ڤه‌گه‌ريانه سه‌ر كارێن خوه و سه‌رپێچكار ده‌سته‌سه‌ركرن
ئه‌ڤرۆ نيوز:
نێزیکی 1200 پێشمەرگێن ژینگەھا دھۆکێ ژ بۆ بەرەڤانیێ ژ ئاخا ھەرێما کوردستانێ کارێ خوە یێ ژنگەھێ بجە ھێلابوون و چوو بوونە بەرۆکێن شەڕی و شەڕ دژی داعش دکرن، لێ نھا جارەکا دی ڤەگەڕیاینە سەر کارێ خوە یێ چاڤدێریا ژینگەھێ.
ئەندازیار محەمەد تاھر بریفکانی، رێڤەبەرێ ژینگەھا دھۆکێ بۆ ئەڤرۆ دیار کر، ئەڤە ماوێ دو سالانە سەرپێچی و زێدەگاڤی ل سەر ژینگەھێ زێدەتر لێ ھاتبوون، چونکو پتریا ئەو پێشمەرگێن چاڤدێریا ژینگەھا دھۆکێ دکرن د شەڕێ دژی رێکخراوا تیرۆرستی یا داعش دابوون، بەلێ نھا ئەو پێشمەرگە ھەموو کو نێزیکی 1200 پێشمەرگەیان بوون ڤەگەڕیاینە سەر کارێ خوە و دەست ب چاڤدێریا ژینگەھێ دکەن.
بریفکانی ئاماژە ب وێ چەندێ ژی کر، د رۆژێن ئێکێ یێن کارێ خوە دا، پێشمەرگێن چاڤدێریا ژینگەھێ دو تۆمەتبار ل ناحیا زاویتە دەستەسەرکرینە کو راببوون ب گرتنا ھژمارەکا کەوان و بۆ دادگەھێ ھاتنە رەوانەکرن.