تورکیا نەشێت خوە ل بەر سزایێن ئەمریکا راگریت
ئه‌ڤرۆ نيوز:
پەیڤدارا وەزارەتا دەرڤە یا ئەمریکا راگەھاند کو وان ھەتا رۆژا چارشەمبیێ دەلیڤە داینە تورکیا دا قەشە برونسۆنی و ١٥ وەلاتیێن دی یێن ئەمریکا کو د زیندانێن تورکیا دانە ئازاد بکەت و گۆت: (ل سەر مێزا سەرۆک ترامپی سزایێن مەزنتر یێن ئابووری و سیاسی ھەنە و ھەکە ھەتا رۆژا چارشەمبیێ برونسۆن نەھێتە ئازادکرن دێ باجا ڤێ ل سەر تورکیا گەلەکێ خراب بیت و سزایێن نوو دێ ل سەر تورکیا ھێنە سەپاندن).
دۆنالد ترامپ سەرۆکێ ئەمریکا ژی ھەر د ڤێ مژارێ دا راگەھاند کو وی بریار دایە ٥٠% باجا ئاسنێ کو ژ تورکیا دھێتە ئەمریکا زێدە بکەت و جارەکا دی دوپات کریە کو دڤێت قەشە برونسۆن ھەتا رۆژا چارشەمبیێ ڤەگەریتە مالا خوە یا ل ئەمریکا، ھەکە نە دێ ل دژی تورکیا گەلەک پێنگاڤێن دی ھێنە ھاڤێتن.
پشتی کو ئەمریکا دەست ب سزادانا تورکیا یا کری پەیوەندیێن ھەردو دەولەتان بەر ب تێکچوونێ ڤە دچیت، بھایێ پارێ تورکی ل ھەمبەر دۆلارێ ئەمریکی گەلەک کێم بوویە و دۆلار نھا گەلەک گران بوویە و ڤێ یەکێ کارتێکرنەکا گەلەک ل ئابووریا تورکیا کریە و د ناڤا ١٥ رۆژێن بۆری دا ٥٧٠ کارگەھێن بچووک و مەزن ھاتینە داخستن و سەرمایەدارێن مەزن یێن بیانی ژ تورکیا دچن.