سەرۆکێ فراکسیۆنا پارتی ره‌خنێ ل باليۆزێ توركيا ل عيراقێ دكه‌ت
ئه‌ڤرۆنيوز:
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ ره‌خنێ ل ئاخڤتنين باليۆزێ توركيا ل عيراقێ دگريت ودبێژيت ئاخڤتنێن وى به‌روڤاژى عورفێن دبلوماسى نه.
ئوميد خوشناو، سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ، ئه‌ڤرۆ شه‌مبيێ 25/8/2018 ل به‌رپه‌رێ خوه ل سه‌ر تۆرا جڤاكى يا فه‌يسبووكى به‌لاڤكر” باليۆزێ توركيا ل عيراقێ دبێژيت كه‌ركووك باژێرێ باب وباپيرێن مه‌يه، ئه‌و ئاخڤتنه چبلى وێ چه‌ندێ كو پێشيلكرنا سه‌روه‌ريه وبه‌روڤاژى هه‌موو عورفه‌كێ دبلوماسى نه، دهه‌مان ده‌م دا فيتنه‌گه‌رى وئاشووب دروستكرنه دناڤ پێكهاتێن كه‌ركووكێ دا وپێكڤه‌ژيانا كه‌ركووكێ دكه‌ته ئارمانج”.
ئومێد خوشناو دياركر” راسته نوكه كه‌ركووك دره‌وشه‌كا داگيركرنێ دايه، ئه‌ڤه ژى پشتى وێ ئێكێ كو بكه‌رێن خيانه‌تا 16 ئوكنۆبه‌رێ خيانه‌تكار ب سه‌ر وى باژێرى دا ئينا”.
گۆت ژى” ئه‌ڤه نێزيكى سه‌ده‌يه‌كى يه مه ئه‌و باوه‌رى يا هه‌ى ودێ به‌رده‌وام ژى بين كو وه‌كو سومبۆلێ مه‌زن يێ نه‌ته‌وا مه (بارزانيێ نه‌مر) گۆتى هه‌كه ئێك كورد ژى د كه‌ركووكێ دا نه‌مينيت، هه‌ر كوردستانى يه”.
سه‌رۆكێ فراكسيۆنا پارتى دياركر ” دبه‌رسڤا وان ئاخڤتنين باليۆزێ توركيا دا دبێژين ناسناما كه‌ركووكێ كوردستانى يه ونه‌ته‌وه وئايينێن جودا ژى تێدا دژين، ئه‌و گۆتنا باليۆزێ توركيا ده‌ستپێكا خراب يا ئاشووب وفيتنه‌گه‌رى يه هه‌كه ئه‌م هه‌موو لايه‌ك دئاگه‌هدار نه‌بين”.
ل رۆژا ئێكێ ژ جه‌ژنا قوربانى، فاتح يه‌لدز، باليۆزێ توركيا ل عيراقێ، سه‌ره‌دانا باژێرێ كه‌ركووكێ كر وب باژێرێ باب وباپيران هژمارتبوو.
