ھژمارەک خالێن سنووری ل گەل ئیرانێ دێ بنە نێڤدەولەتی
ئه‌ڤرۆ نيوز:
بڕیارە ھژمارەکا خالێن سنووری د ناڤبەرا ھەرێما کوردستان و ئیرانێ دا بھێنە فەرمیکرن و بەرپرسێ پەیوەندیێن د ناڤبەرا ھەرێم و ئیرانێ ژی دا دبێژیت، ب تنێ بڕیارا بەغدا مایە بۆ نێڤدەولەتیکرن و فەرمیکرنا شەش خالێن سنووری.
عەبدوللا ئاکرەیی، بەرپرسێ پەیوەندیێن ھەرێم و ئیرانێ بۆ رۆژناما ئەڤرۆ دیار کر کو ھژمارەکا دەرگەھێن سنووری د ناڤبەرا ھەرێما کوردستان و بەغدا دێ بنە دەرگەھێن فەرمی و ب تنێ بڕیارا حوکمەتا عیراقێ مایە ل سەر بھێتەدان، ژ بەر کو نێزیکی شەش خالێن سنووری نوکە د ناڤبەرا ھەرێما کوردستانێ و کۆمارا ئیسلامیا ئیرانێ دا ھێشتا نەبووینە فەرمی و بۆ کارێن بازرگانی ناھێنە بکارئینان و گۆت: “ب تنێ وەلاتی دشێن ھاتنوچوونێ تێدا بکەن، بزاڤێن مە د بەردەوامن ئەو ژی ببنە دەرگەھێن فەرمی و نێڤدەولەتی بۆ پتر گەشەکرنا پەیوەندیێن بازرگانی دگەل ئیرانێ”.
ناڤھاتی ئاماژە دا وێ چەندێ کو بەری نوکە شاندەکێ حوکمەتا عیراقێ سەرەدانا ئەڤان خالێن سنووری کریە، چونکی مەرجە ھەر دو حوکمەتێن عیراق و ئیرانێ بگەھنە رێکەفتنێ و رازیبن ل سەر فەرمیکرنا وان، ئیران رازیبوویە ب تنێ بەغدا مایە ئەڤ مەرجێن پێدڤی ب تایبەتی یێن ب نێڤدەولەتیکرنێ ھاتینە بجە ئینان و گۆت: “نوکە ئەم چاڤەڕێی بڕیارا حوکمەتا عیراقێ دکەین، چونکی ب فەرمیکرن و نێڤدەولەتیکرنا ئەڤان خالێن سنووری دێ پتر بزاڤێن ئابووری و بازرگانی گەشێ کەن”.
