نەجیبا نەجیب: لایەنێن عیراقی دێ بجھکرنا 17% یا پشکا ھەرێمێ رازی بن
ئەڤرۆ نيوز:
ئەندامەکا خۆلا سێیێ یا لیژنا دارایی ل پەرلەمانێ عیراقێ بۆ رۆژناما ئەڤرۆ دیار کر کو مەرجێ پێشوەخت یێ کوردان بۆ لایەنان مسۆگەرکرنا 17% یا بۆدجێ یە و ئێکلاکرنا پرسا پەترۆلا ھەرێما کوردستانێ یە.
نەجیبا نەجیب، ئەندامەکا خۆلا سێیێ یا لیژنا دارایی ل پەرلەمانێ عیراقێ ئاشکرا کر کو لایەنێن شیعی بێ کوردان ب تایبەتی پارتی و ئێکەتی کو خودانێن 45 کۆرسیێن پەرلەمانی نە نەشێن حوکمەتا نوو دروست بکەن و گۆت: “ئێک ژ خالێن سەرەکی یێن پرۆژێ پارتی و ئێکەتیێ بۆ دانوستاندنێ و چوونا د ناڤ پرۆسا پێکئینانا حوکمەتێ دا چارەکرنا پرسێن دارایی یە و مسۆگەرکرنا 17% یا پشکا بۆدجا ھەرێما کوردستانێ یە ژ بۆدجا گشتی یا عیراقێ”.
ناڤھاتیێ ئاماژە دا وێ چەندێ کو مەرەم ژ ئاریشێن دارایی ئێکلاکرنا پرسا ھنارتنا پەترۆلا ھەرێما کوردستانێ یە ب شێوێ سەربەخوە، چونکی ل سالا 2015ێ وێڤە ھەرێما کوردستانێ راستەوخۆ پەترۆلا خۆ د ھنێریتە دەرڤە و پێدڤیە ئەڤ بابەتە بھێتە ئێکلاکرن و گۆت: “بەغدا ب خوە یا رازی یە ھەرێما کوردستانێ ب شێوەکێ سەربەخۆ پەترۆلا خوە ب فرۆشیت، بەلێ ژ بەر کو ژ روویێ قانوونی ڤە نەھاتیە ئێکلاکرن بھایێ وێ ئەرزانترە ژ بھایێن بازاری، ئانکو ب گورەی دستووری قانوونیە و بەغدا دانپێدان ب ڤێ چەندێ یا کری”.
