چارەسەریا قەیرانا سووریێ ژ دەستێ رژێمێ و ئۆپۆزسیۆنێ دەرکەفتیە
ئه‌ڤرۆ نيوز:
ئەندامەکێ مەکتەبا سیاسی یا پارتی دیموکراتی کوردستان- سووریا دیار دکەت کو ئێدی رژێما سووریێ و بەرھنگاریا وی وەلاتی چو رۆلەکێ وەسا کاریگەر د چارەکرنا قەیرانا سووریێ دا نابینن و نھا ئەمریکا و روسیا بۆ چارەکرنا قەیرانا سووریێ دانوستاندنان دکەن و ل گۆر بەرژەوەندیێن خوە دخوازن چارەیەکێ بۆ قەیرانا نھا یا سووریێ پەیدا بکەن.
محەمەد عەلی ئەندامێ مەکتەبا سیاسی یا پارتی دیموکراتی کوردستان- سووریا د دیدارەکا تایبەت دا بۆ رۆژناما ئەڤرۆ دیار کر کو ئۆپەراسیۆنا ئدلبێ دێ گەلەک گوھۆڕینان ل سووریێ دروست کەت، چونکو نھا ئەمریکا و روسیا بزاڤێ دکەن کو بەرژەوەندیێن خوە ل سووریێ ب پارێزن و ئەمریکا ژی داخواز ژ روسیا کریە کو ھێزێن ئیرانێ ژ سووریێ دەرخینیت، ھەکە روسیا ب ڤی ئەرکی رابیت و ھێزێن ئیرانێ ژ سووریێ دەرخینیت وی دەمی رەنگە قەیرانا سووریێ زووتر بھێتە چارەکرن و گۆت: (لێ دیارە روسیا ژی نھا نەشێت وەسا زوو ئیرانێ رازی بکەت کو ژ سووریێ دەرکەڤیت و ل ئالیێ دی نھا ناکۆکیێن مەزن د ناڤبەرا تورکیا و روسیا دا ل دۆر ئدلبێ ھەنە، چونکو روسیا ل دژی ئۆپەراسیۆنا ئدلبێ نینە، لێ تورکیا ژ ھندێ دترسیت کو ئەو ھێزێن ھەتا نھا پشتەڤانیا وان دکر ل ئدلبێ ژناڤ بچن و وی دەمی پیلانێن تورکیا بۆ سووریا نوو دێ ژناڤ چن، ژ بەر ھندێ ژی ھەتا نھا ناکۆکیێن د ناڤبەرا ئەمریکا و روسیا ل گەل تورکیا و وەلاتێن دی ل دۆر سووریێ بەردەوامن).
ناڤبری ئەو یەک ژی دیار کر کو ھەکە روسیا بشێت ھێزێن ئیرانێ ژ سووریێ دەرخینیت دێ گەلەک تشت ھێنە گوھۆڕین و سزایێن نھا ئەمریکا ل سەر روسیا سەپاندینە دێ ھێنە راکرن و ژ بەر ھندێ ژی ئۆپەراسیۆنا ئدلبێ و قۆناغا پشتی ئۆپەراسیۆنێ دێ بۆ پاشەرۆژا سووریێ یا گرنگ بیت و گۆت: (ئدلب و پاشەرۆژا وێ وەکو کلیدا چارەکرنا قەیرانا سووریێ لێ ھاتیە، تورکیا و ئیران ژی دخوازن بەرژەوەندیێن خوە ل سووریێ ب پارێزن، لێ ئەمریکا و روسیا دەمێ بریارەکێ بدەن ئەو گوە نادەنە چو وەلاتێن دی، ژ بەر ھندێ ژی نھا ئاریشا سەرەکی ئەڤە کا دێ ئەمریکا و روسیا ل دۆر ئدلبێ و ھەروەسا سیستەمێ نوو یێ سووریێ بریارەکا چاوا بدەن، تورکیا ژی چاڤەرێ ھندێ یە و دخوازیت ب رێیا روسیا بەرژەوەندیێن خوە ل سووریێ ب پارێزیت، لێ ناکۆکیێن مەزن د ناڤبەرا تورکیا و روسیا دا ل دۆر ئدلبێ ژی ھەنە).
ل دۆر پاشەرۆژا سووریێ ژی ئەندامێ مەکتەبا سیاسی یا پارتی دیموکراتی کوردستان- سووریا راگەھاند کو ئێدی دەستھەلاتدارێن شامێ نەشێن ب تنێ حوکمێ ل ھەموو سووریێ بکەن، ئانکۆ ئێدی سیستەمێ بەرێ یێ سووریێ دوبارە نابیت، روسیا و ئەمریکا ژی ڤێ یەکێ باش دزانن و ژ بەر ھندێ ژی نھا کار ل سەر دستوورەکێ نوو بۆ سووریێ دکەن کو ئەم وەکو ئەنجوومەنێ نیشتمانی یێ کوردی ل سووریێ د ئامادەکرنا دستوورێ نوو یێ سووریێ دا پشکدارین و گۆت: (بریارە دی میستۆرا ل گەل لیژنا ئامادەکار یا دستوورێ نوو یێ سووریێ کۆم ببیت، روسیا ژی دخوازیت ب رێیا دستوورێ نوو یێ سووریێ چارەکێ بۆ قەیرانا وی وەلاتی پەیدا بکەت و ژ بەر ھندێ ژی نھا کار ل سەر دستوورێ نوو یێ سووریێ دھێتە کرن).
ل دۆر مافێ کوردان ل سووریێ ژی ناڤھاتی راگەھاند کو ئەم وەکو ئەنجوومەنێ نیشتمانی یێ کوردی ل سووریێ بزاڤەکا مەزن بۆ بدەستڤەئینانا مافێن نەتەوی یێن گەلێ کورد ل سووریێ دکەین، پەیوەندیێن مە یێن دبلۆماسی ل گەل ئەمریکا و روسیا و وەلاتێن دی یێن جیھانێ بۆ ڤێ یەکێ د بەردەوامن و گۆت: (دستوورێ نوو یێ سووریێ بۆ مە کوردان گرنگە، چونکو ئەم دشێین ب رێیا دستوورێ نوو مافێن خوە د سیستەمێ نوو یێ سووریێ دا گەرەنتی بکەین، ئەم دێ ھەموو بزاڤەکێ کەین کو ب رێیا دستووری مافێن خوە بدەستڤە بینین و بێگومان دستوور تنێ ژی تێر ناکەت و گرنگە تشتێ د دستووری دا بھێنە نڤیسین وەسا بھێنە بجھئینان ژی).
