“تێکچوونا پەیوەندیێن تورکیا و ئەمریکا بەروەختە”
سەرۆکێ گشتی یێ پارتا سوسیالیست یا باکورێ کوردستانێ دیار دکەت کو تێکچوونا پەیوەندیێن تورکیا و ئەمریکا بەروەختە و ئەمریکا ھندەک دخوازی ژ تورکیا ھەنە و یا دی نھا تورکیا پتر ژ ھەر دەمەکێ تەنگاڤە و نەچارە ھندەک داخوازیێن ئەمریکا قەبوول بکەت و ئەز ب باوەرم دێ پشتی دەمەکێ جارەکا دی پەیوەندیێن ھەر دو وەلاتان ئاسایی ببنە ڤە.
دیدار، ھۆشەنگ تاجر:
مەسعود تەک سەرۆکێ گشتی یێ پارتا سوسیالیست یا باکورێ کوردستانێ د دیارەکا تایبەت دا ل گەل رۆژناما ئەڤرۆ دیار کر کو نھا تورکیا پتر ژ ھەر دەمەکێ تەنگاڤ بوویە و ب تایبەتی ژی رەوشا ئابووری یا تورکیا خرابە، راستە نھا تورکیا ل ھەمبەر ئەمریکا بەرخوەدانیێ دکەت لێ ئەز باوەر ناکەم ئەڤ رەوشا نھا زێدە درێژ بکەت، چونکو ئەردۆگان ژی باش دزانیت ھەکە رەوشا ژیانا وەلاتیان پتر تێک بچیت دێ رەوشا ناڤخوەیی یا تورکیا ئالۆزتر لێ ھێت و ژ بەر ھندێ ژی ئەز باوەر دکەم دێ جارەکا دی دانوستاندن د ناڤبەرا ئەمریکا و تورکیا دا دەستپێ بکەن و گۆت: (تورکیا ئێکە ژ وان وەلاتێن رۆژھەلاتا ناڤین کو دشێت زوو ب زوو سیاسەتا خوە یا دەرڤە بگوھۆریت و ل ھەمبەر روسیا ژی ھەمان تشت ھاتە کرن و پاشی پەیوەندی ئاسایی بین و ئەز ب باوەرم دێ ل گەل ئەمریکا ژی پشتی دەمەکێ پەیوەندیێن خوە ئاسایی کەتە ڤە).
ناڤبری د پشکەکا دی یا ئاخڤتنا خوە دا ئەو یەک ژی دیار کر کو نھا تورکیا نەشێت بێی ئەمریکا و رۆژئاڤا بژیت، جڤاکێ تورکیا ژی رەنگە نھا ھندەک تشتان قەبوول دکەت لێ ھەکە رەوش خرابتر ببیت دێ ل دژی ئەردۆگانی و سیاسەتا وی دەرکەڤن و ژ بەر ھندێ ژی ئەز دبێژم ئەڤ ئالۆزی بەروەختن و دێ ھێنە چارەکرن و گۆت: (یا دی ئەمریکا ژی نھا پێدڤی تورکیا یە، ئەمریکا ب چو رەنگەکێ رازی نابیت کو تورکیا بچیتە د ناڤا بەرەیەکێ روسیا دا و بەرپرسێن تورکیا ژی باش دزانن کو ھەکە د گەل بەرەیێ رۆژئاڤا دا بن دێ پتر بۆ وان باش بیت، لێ ھندەک ناکۆکی ھەنە و ھەر دو ئالی ژی دخوازن داخوازیێن خوە ل سەر یێن دی بسەپینن، لێ ئەڤە ژی سیاسەتە و پشتی دەمەکێ دێ ئەڤ ئالۆزیە ژی ھێتە چارەکرن).
ل دۆر سیاسەتا تورکیا ل ھەمبەر پرسا کوردی و پارچێن دی یێن کوردستانێ ژی ناڤھاتی دیار کر کو دڤێت ژبیر نەکەین سیاسەتا دەولەتا تورکیا ل سەر بنەمایێ ئینکارکرنا کوردان ھاتیە ئاڤاکرن و ھەتا نھا ژی ئەو یەک بەردەوام دکەت و د ڤان رۆژێن دووماھیێ دا جارەکا دی ئەردۆگان گەفان ل کوردان دکەت و دبێژیت دێ ھەموو رۆژئاڤایێ کوردستانێ داگیر کەین و مخابن ھەلویستێ وان ل ھەمبەر ھەرێما کوردستانێ ژی باش نینە.
ناڤبری د دووماھیا ئاخڤتنا خوە دا ئەو یەک ژی دیار کر کو نھا باژێرڤانیێن تورکیا دێ سەر ب سەرۆکاتیا تورکیا بن، بێگومان ئەڤ قانوونە ب تەمامی ل دژی کوردان ھاتیە دەرخستن و دخوازن ئەو دەستھەلاتا کێم یا کو بەری نھا باژێرڤانیێن باکورێ کوردستانێ ھەبوون ژی نەمینیت و گۆت: (ئەڤە ژی بێگومان ب تەمامی ل دژی دیموکراسیێ یە و تورکیا نھا بەر ب دەستھەلاتەکا تاکەکەسی ڤە دچیت و ئەردۆگان دشێت بۆدجێ ھەموو باژێرڤانیێن باکورێ کوردستانێ رابگریت، چونکو قانوونا نھا رێکێ ددەتێ و ئەڤە ژی مەترسیەکا مەزنە بۆ کوردان و دیموکراسیا تورکیا).
