روسیا دخوازیت بنگەھێن سەربازی ل تورکیا و ئیرانێ ئاڤا بکەت
ئه‌ڤرۆ نيوز:
ڤیلادەمیر ژیرینۆڤسکی سەرۆکێ پارتا لیبرال یا روسیا د داخۆیانیەکی دا بۆ تەلەفزیۆنا رۆسیا ٢٤ راگەھاند کو تورکیا دخوازیت بنگەھێ سەربازی یێ ئینجیرلیک چۆل بکەت و وی بنگەھی بدەتە روسیا و گۆت: (دڤێت ئەم زێدەتر ھێزا سەربازی و تەکنیکی ل رۆژھەلاتا ناڤین و تورکیا بجە بکەین و ل ھەرێمێ بزاڤا ئەمریکا و ناتۆ کێمتر بکەین و بۆ ڤێ چەندێ ژی نھا رەوشەکا گەلەکا گونجای یا ھەی و سەرۆک کۆمارێ تورکیا ژی وەکو ئیرانێ دخوازیت ل گەل روسیا بیت).
سەرۆکێ پارتا لیبرال یا روسیا راگەھاند ژی کو نھا رەجەب تەیب ئەردۆگان سەرۆک کۆمارێ تورکیا یە و ئەو یەک بۆ روسیا گەلەک باشە و گۆت: (دەمێ کو بەرێز ئەردۆگان ل گەل مە دا بیت دێ تورکیا ژی بھێزتر بیت و سەنگا وان و کاریگەریا وان ل ھەرێمێ و جیھانێ زێدەتر ببیت، نھا دەمێ ئاڤاکرنا ھەڤپەیمانیێن نوو یە و ل ئالیەکێ ئیران ھەیە و ل ئالیێ دی ژی تورکیا ھەیە و ئیران ھەڤپەیمانێ مە یە و تورکیا ژی دخوازیت ژ ناتۆ و ئەمریکا دوور بکەڤیت و ببیتە ھەڤپەیمانێ مە، بۆ ڤێ چەندێ دڤێت بەرێز پوتین پێنگاڤێن پێدڤی ل گەل ئەردۆگانی بھاڤێژیت دا کو قۆناغەکا نوو بھێتە دەستپێکرن).
د داویا ئاخڤتنا خوە دا ژی ژیرینۆڤسکی راگەھاند کو نھا روسیا، تورکیا و ئیران پێکڤە ل سووریێ کار دکەن و د ئەنجاما پێکڤە کارکرنا ھەر سێ دەولەتان دا نھا تیرۆرست بەر ب نەمانێ ڤە دچن و گۆت: (ب سایا ھەڤپەیمانیا سەر عەردی یا ھەر سێ دەولەتان نھا پرانیا سووریێ ژ تیرۆرستان ھاتیە پاقژ کرن و دڤێت ھەڤپەیمانی و پێکڤە کارکرنا ھەر سێ دەولەتان د ھەر واری دا بھێتە بھێز کرن و دەمێ ئەڤ ھەڤپەیمانی بەرفرەە و بھێزتر ببیت، ناتۆ و ئەمریکا نەشێن وەکو بەرێ ل رۆژھەلاتا ناڤین ئالۆزیان بۆ مە دروست بکەن).
